तंटामुक्त गाव पुरस्कारासाठी आवाहन

धुळे । महात्मा गांधी तंटामुक्त गाव मोहिमेंतर्गत पत्रकारांसाठी शासनाने जिल्हा, विभाग, राज्यस्तरावर पुरस्कार देण्याची योजना जाहीर केली आहे. त्याअनुषंगाने जिल्ह्यातील पत्रकारांनी या पुरस्कारासाठी आपल्या प्रवेशिका 31 मे 2017 पर्यंत सादर कराव्यात, असे आवाहन महात्मा गांधी तंटामुक्त गाव मोहीम पत्रकार पुरस्कार जिल्हास्तरीय समितीने केले आहे.

जिल्हास्तरीय प्रथम पुरस्कार 25 हजार रुपये
जिल्हास्तरीय प्रथम पुरस्कार 25 हजार रुपये, द्वितीय पुरस्कार 15 हजार रुपये, तर तृतीय पुरस्कार 10 हजार रुपये असा आहे. महात्मा गांधी तंटामुक्त गाव मोहिमेच्या प्रसिध्दीसाठी बातमीदारांनी दि. 2 मे 2016 ते 1 मे 2017 या कालावधीमध्ये मोहिमेचे प्रसिध्द केलेले साहित्य पुरस्कार पात्रतेकरीता ग्राह्य धरण्यात येईल. पुरस्कारासाठी दिलेल्या कालावधीत वृत्तपत्रे, नियतकालिकांमधून प्रसिध्द झालेले टीकात्मक लेख, वृत्तांकन, बातम्या, अग्रलेख, फोटो फिचर्स अशा साहित्याचा विचार करण्यात येईल. पुरस्कारासाठी वृत्तपत्रांचे बातमीदार, स्तंभलेखक, मुक्त पत्रकार पात्र असतील. पारितोषिकासाठी मराठी, हिंदी, इंग्रजी भाषेत प्रसिध्द केलेल्या साहित्याचा विचार करण्यात येईल. धुळे जिल्ह्यातील पत्रकारांनी आपल्या प्रवेशिका जिल्हा माहिती अधिकारी तथा सदस्य सचिव महात्मा गांधी तंटामुक्त गाव मोहीम पत्रकार पुरस्कार, जिल्हास्तरीय समिती, जिल्हा माहिती कार्यालय, प्रशासकीय संकुल, धुळे यांच्याकडे 31 मे 2017 पर्यंत सादर करावेत.