तब्बल 1 हजार 657 मोबाईल टॉवर अनधिकृत
नगरसेवक भानगिरे यांनी उपस्थित केला प्रश्‍न; प्रसोसायटी पदाधिकार्‍यांच्या संगनमताने टॉवर्स
पुणे : गेल्या काही वर्षांत शहरात सर्वच भागात इमारतीच्या छतावर सर्रास अनधिकृतपणे मोबाईल टॉवरची उभारणी करण्यात आली आहे. शहरात सध्या उभे असलेले 1 हजार 895 पैकी केवळ 238 मोबाईल टॉवर अधिकृत आहे. तब्बल 1 हजार 657 मोबाईल टॉवर अनधिकृत असल्याचे प्रशासनाने दिलेल्या माहितीवरून स्पष्ट झाले आहे. सोसायट्यांच्या पदाधिकार्‍यांच्या संगनमतांने अशा बेकायदेशीर टॉवरची उभारणी होत आहे. मोबाईल टॉवर्सच्या रेडियशनमुळे त्रास होत असल्याच्या तक्रारी नागरिकांनी महापालिकेकडे केल्या आहेत.
शहरातील अनधिकृत मोबाईल टॉवर्स, यासाठी महापालिकेकडून आकारण्यात येणारा दर, यामुळे महापालिकेला मिळणार उत्पन्न, नागरिकांच्या आलेल्या तक्रारी आणि करण्यात आलेली कारवाईबाबत नगरसेवक प्रमोद भानगिरे यांनी प्रशासनाला लेखी प्रश्‍न विचारले होते. या प्रश्‍नांना लेखी उत्तर देताना वरील माहिती समोर आली आहे. महापालिकेच्या हद्दीत विविध मोबाईल कंपन्यांकडून सर्व भागात इमारतींच्या छतावर, जमिनीवर मोठ्या प्रमाणात अनधिकृत मोबाईल टॉवर उभारले आहेत.
शहरात मोबाईल टॉवरला परवानगी देण्यासाठी स्कु्रटिनी फी म्हणून प्रत्येकी 600 रुपये आणि एकरकमी प्रशासकीय शुल्क रक्कम 30 हजार रुपये, इमारतीवरली मोबाईल टॉवर बांधकामासाठी शिघ्रसिद्धागणक दराच्या 40 टक्क्यांपैकी 8 टक्क्यानुसार दर घेतले जातात. तर मोकळ्या जागेवर मोबाईल टॉवर असल्यास 8 टक्क्यापैकी जागेच्या शिघ्रसिद्धगणक दरानुसार मोबाईल टॉवरला परवानगी देण्यासाठी दर आकारले जातात.
मोबाईल टॉवरच्या माध्यमातून महापालिकेला 7 कोटी 24 लाख रुपयांचे उत्पन्न मिळाले आहे. मोबाईल टॉवरच्या मिळकत करातून एप्रिल ते 3 डिसेंबरअखेरपर्यंत 31 कोटी 36 लाखांचे उत्पन्न मिळाले आहे. शहरात सर्रास उभारण्यात आलेल्या अनधिकृत मोबाईल टॉवरच्या रेडिअशनमुळे इमारती लगतच्या नागरिकांना त्रास होत आहे. याबाबत महापालिकेकडे नागरिकांनी लेखी तक्रारी देखील केल्या आहेत. ज्या भागातून नागरिकांनी तक्रारी दाखल केल्या त्या मोबाईल टॉवरवर कारवाई करणार, असा प्रश्‍न उपस्थित केला आहे.