तळवडे अग्निशामक केंद्रातील विविध कामे सुरू

तळवडे : तळवडे येथील अग्निशामक केंद्राला सीमाभींत, कार्यालय, कर्मचारी खोली आदी कामे सुरू करण्यात आली आहेत. तळवडे परिसरातील सॉफ्टवेअर पार्क चौकात जकात नाक्याचा शेडमध्ये दोन वर्षांपूर्वी अग्निशामक केंद्राची स्थापना करण्यात आली होती. पुरेशा सुविधांअभावी अग्निशमन केंद्र समस्यांच्या विळख्यात सापडले होते. या ठिकाणी पायाभूत सुविधा पुरविण्याची मागणी करण्यात येत होती. त्यानुसार येथे सीमाभिंत उभारण्यात येत असून कर्मचार्‍यांसाठी अद्ययावत सुविधा असलेला कक्ष उभारण्यात येत आहे. त्यामुळे कर्मचार्‍यांच्या सुरक्षेचा प्रश्‍न सुुटणार आहे.  यावेळी नगरसेवक पंकज भालेकर, प्रवीण भालेकर, संगिता ताम्हाणे, पौर्णिमा सोनवणे, अग्निशामक विभागाचे अधिकारी ज्ञानेश्‍वर भालेकर, रविंद्र सोनवणे आदी उपस्थित होेते. अग्निशामक केंद्रालगत वनीकरण आहे. त्यामुळे या केंद्रात सरपटणारे प्राणी, भटकी कुत्री तसेच इतर प्राण्यांचा उपद्रव वाढला आहे. लवकरच या समस्या सुटणार आहेत.

तळवडे येथील नगरसेवक पंकज भालेकर यांनी सांगितले की, पिंपरी-चिंचवड महापालिकेच्यावतीने दोन वर्षांपूर्वी तळवडे येथे अग्निशामक केंद्राची उभारणी करण्यात आली होती. आपत्तीच्या वेळी या केंद्राच्या माध्यमातून मोलाची मदत झाली आहे. या केंदाची सीमाभिंत उभारणीचे काम सुरू करण्यात आले आहे. इतर आवश्यक आणि पायाभूत सुविधाही महापालिका लवकरच उपलब्ध करून देणार आहे.

नगरसेवक प्रवीण भालेकर यांनी सांगितले की, केंद्राला सीमभिंत नसल्याने मोठ्या प्रमाणात लघुउद्योगाचे जाळे उभारले जात आहे. नागरीकीकरण वाढल्याने या परिसरात सॉफ्टवेअर चौकात तात्पुरत्या स्वरूपात उभारलेल्या अग्निशामक केंद्रामुळे वेळोवेळी आप्तकालीन परिस्थितीत नागरिकांना दिलासा मिळाला आहे. परंतु रात्री अपरात्री येथे सरपटणारे प्राणी येत असल्याने कर्मचार्‍यांचा जीवास मोठा धोका निर्माण झाला होता. मात्र महपालिकेने सीमाभिंत बांधून यावर तोडगा काढला आहे. कायम स्वरूपी अग्निशामक केंद्राची उभारणी करण्याच्या कामाला सुरूवात झाली आहे. त्यामुळे कर्मचार्‍यांच्या समस्या सुटणार आहेत.