तो दक्षीण भारतातील एका हॉटेलात काम करतोय
नवी दिल्ली । दिल्लीत घडलेल्या ‘निर्भया बलात्कार’ प्रकरणातील 4 दोषींची फाशीची शिक्षा कायम ठेवण्याचा निर्णय सर्वोच्च न्यायालयाने दिलाय. परंतु, याच प्रकरणातील दोषी असलेला परंतु, अल्पवयीन असल्याचा फायदा मिळालेला पाचवा अल्पवयीन आता कुठे आहे? सध्या तो काय करतो? असे अनेक प्रश्न अनेकांच्या मनात आले. मिळालेल्या माहितीनुसार, हा अल्पवयीन सध्या दक्षिण भारतातल्या एका रेस्टॉरन्टमध्ये काम करतोय. ज्युवेनाईल अ‍ॅक्टनुसार तीन वर्षांच्या शिक्षेनंतर त्याला सोडण्यात आले. या अल्पवयीन आरोपीच्या पुनर्वसनाची जबाबदारी सोपवल्या गेलेल्यांपैकी एका अधिकार्‍याच्या माहितीनुसार, ‘आफ्टर केअर’ प्रोग्रामनुसार या आरोपीची ओळख जाहीर केली जाऊ शकत नाही.
त्याच्या जीवाला धोका असल्याने गुप्तता पाळली
अल्पवयीन आरोपीला 20 डिसेंबर 2015 रोजी सोडण्यात आले होते. त्याच्या जीवाला धोका असल्याचे ओळखून अधिकार्‍यांनी त्याला एका गुप्त जागेवर ठेवले होते. त्यानंतर त्याला एका एनजीओकडे ठेवण्यात आले. काही दिवसांनी त्याने एका दक्षिण भारतातल्या रेस्टॉरन्टमध्ये कूक म्हणून काम सुरू केले. मुलाच्या सुरक्षिततेसाठी जिथे तो काम करतोय तिथही कुणाला त्याच्याबद्दल फारशी माहिती देण्यात आलेली नाही.
अधिकार्‍याच्या म्हणण्यानुसार, हा अल्पवयीन उत्तरप्रदेशचा रहिवासी होता. कामाच्या निमित्ताने तो दिल्लीत दाखल झाला आणि पैसे कमावण्याच्या नादात तो राम सिंहच्या संपर्कात आला. राम सिंहने त्याला बस साफ करण्याचे काम दिले होते.