दाऊदच्या साथीदारांकडून मुंबईत बॉम्बस्फोट घडवण्याची धमकी

मुंबई । अंडरवर्ल्ड डॉन दाऊद इब्राहिमच्या मुंबईतील मालमत्तांचा लिलाव करण्यात आल्याने दाऊद भडकला आहे. ही मालमत्ता कोणीही ताब्यात घेऊ नये म्हणून त्याच्या साथीदाराकडून धमक्या येऊ लागल्या आहेत. ‘दाऊदची मालमत्ता कोणी ताब्यात घेतली तर मुंबईत 1993 च्या बॉम्बस्फोटाची पुनरावृत्ती घडवून आणू. मुंबईत पुन्हा बॉम्बस्फोट करू,’ असा इशाराच त्याच्या साथीदाराने दिला आहे.

मंगळवारी दाऊदच्या मुंबईतील तिन्ही मालमत्तांचा लिलाव करण्यात आला. या लिलावात डी कंपनीने कोणताही रस दाखवला नव्हता. त्यामुळे मुंबई पोलीसही आश्‍चर्यचकीत झाले होते. मात्र दाऊदचा एक साथीदार उस्मान चौधरी याने रात्री उशिरा एका वृत्तवाहिनीला फोन केला आणि जर कोणी दाऊदची मालमत्ता ताब्यात घेतली तर मुंबई बॉम्बस्फोटांनी उडवून देऊ, अशी धमकी दिली.

याआधीही दिलेली धमकी
दाऊदच्या साथीदाराने दिलेल्या या नव्या धमकीमुळे मुंबई पोलीस सतर्क झाले आहेत. ’2002 आणि 2015 मध्ये दाऊदच्या मालमत्तांचा लिलाव झाला होता. हा लिलाव होऊ नये म्हणून तेव्हा दाऊदचे साथीदार सक्रिय झाले होते. त्यावेळी कोणत्याही परिस्थितीत भाईची मालमत्ता दुसर्‍यांच्या ताब्यात जाऊ नये, असे आदेशच दाऊदचा भाऊ अनीस आणि छोटा शकीलने त्यांच्या साथीदारांना दिला होता.