दारूबंदीसाठी जिल्हाधिकारी कार्यालयावर धडक

बुलडाणा । जिल्ह्यातील मलकापूर ग्रामीण ग्रामपंचायत अंतर्गत येणार्‍या बंसीलाल नगर मार्गावरील सुरु करण्यात आलेल्या दारु दुकानाला हटविण्यासाठी ऐन हरतालीकेच्या दिवशी दारुबंदीच्या प्रणेत्या प्रेमलता सोनुने यांच्या नेतृत्वात आंदोलन करण्यात आले होते. यावेळी शेकडो महिलांनी दारु दुकान बंद करण्याची मागणी करत तब्बल सहा तास ठिय्या देत हे आंदोलन केले. यानंतर उपविभागीय विभागीय कार्यालयातच हरतालीका पुजा अर्चा केली. सदर आंदोलनाची दखल घेत जिल्हाधिकारी यांनी सोमवारी सदर आंदोलनकर्त्या महिलांना जिल्हाधिकारी कार्यालयात बोलावून चर्चा प्रारंभ केली आहे.

प्रशासनाने झटकले हात
अस्तित्व महिला फाऊंडेशनच्या अध्यक्षा प्रेमलता सोनुने यांच्या नेतृत्वात मलकापूर ग्रामीण ग्रामपंचायतीत सभा आयोजीत करण्यात आली होती. यावेळी दारुबंदीच्या मागणीला घेवून महिलांचा मोर्चा सभेवर धडकला. दारुच्या दुकानाला परवानगी दिलीच कशी असा सवाल यावेळी केल्यानंतर प्रशासनाने हात झटकत बांधकाम विभागाच्या अधिकार्‍यांवर परवानगी दिल्याचे घोंगडे झटकले. त्यानंतर आक्रमक झालेल्या महिलांनी प्रेमलता सोनुने व सरपंच विद्या वराडे यांच्या सह उपविभागीय कार्यालयावर मोर्चा काढला होता. संध्याकाळ पर्यंत ठिय्या आंदोलन केल्यानंतर ऐन हरतालीकेचा सण असल्याने महिलांची उपस्थिती लक्षणिय होती. यानंतर आंदोलनास्थळीच महिलांच्या वतीने हरतालीकेची पुजा मांडण्यात आली होती. उपविभागीय अधिकारी सुनिल विंचरकर यांनी जिल्हाधिकार्‍यांसोबत बैठक घेवून चर्चा करणार आहे.