दारूसाठी पैसे न दिल्याने तरुणाला मारहाण : एकाविरोधात गुन्हा

जळगाव : दारू पिण्यासाठी पैसे न दिल्याच्या रागातून 35 वर्षीय तरुणाच्या डोक्यात काठी मारून गंभीर दुखापत करण्यात आली. ही घटना शहरातील इच्छादेवी चौकात घडली. याप्रकरणी एमआयडीसी पोलीस ठाण्यात एकाविरोधात गुन्हा दाखल करण्यात आला.

पैसे न दिल्याने मारहाण
कुणाल सुधाकर बागुल (35, रा.हनुमान नगर, मेहरूण) हा तरुण मजुरी करून उदरनिर्वाह करतो. बुधवार, 2 मार्च रोजी दुपारी चार वाजेच्या सुमारास शहरातील इच्छादेवी चौकात उभा असताना त्याठिकाणी सलीम ऊर्फ भाल्या तडवी (रा.तांबापुरा, जळगाव) हा आल्यानंतर त्याने कुणालकडे दारू पिण्यासाठी पैसे मागितले. कुणालने दारूसाठी पैसे न दिल्याने त्याचा राग येवून सलीम तडवी याने हातातील काठी डोक्यावर मारल्याने कुणाल गंभीर जखमी झाला. त्याला तातडीने जिल्हा शासकीय वैद्यकीय महाविद्यालयात उपचारासाठी दाखल करण्यात आले. या संदर्भात गुरुवार, 3 मार्च रोजी दुपारी एक वाजता संशयीत आरोपी सलीम ऊर्फ भाल्या तडवी (तांबापुरा) याच्याविरोधात गुन्हा दाखल करण्यात आला. पुढील तपास पोलिस नाईक सुनील सोनार करीत आहे.