‘द बर्निंग पीएमपीएल’च्या घटना थांबेना; आज पुन्हा एक बस जळून खाक !

पुणे: पीएमपीएलच्या बसला आग लागण्याच्या घटना नेहमीच्याच झाल्या आहेत. बुधवारी सकाळी १० वाजून ४५ मिनिटांनी निगडी- कात्रज बायपास ही बस वारजे पूलाजवळ (रोझरी शाळा) येथे आली असता बोनेटमधुन अचानक धुर निघायला सुरुवात झाली. चालक रमेश उगले यांच्या ही बाब लक्षात येताच त्यांनी बसचे हँड ब्रेक दाबून प्रवाशांना खाली उतरण्यास सांगितले. यानंतर काही वेळातच पेट घेतला. आगीत बस पूर्णपणे जळून खाक झाली. सुदैवाने यात कोणतीही जीवितहानी झालेली नाही.

पीएमपीच्या बसमधून प्रवाशी उतरल्यानंतर काही सेंकदातच बसने पेट घेतला. तात्काळ या घटनेची माहिती अग्निशामक दलाला देण्यात आली. सिंहगड रस्ता व कोथरुड येथून अग्निशामक दलाचे दोन बंब घटनास्थळी दाखल झाले व त्यांनी काही मिनिटांमध्ये ही बसला लागलेली आग विझविली . मात्र, तोपर्यंत बस पूर्ण्रपणे जळून खाक झाली होती.