धर्मा पाटलांच्या कुटुंबियांना मिळणार ५४ लाख मोबदला

जिल्हाधिकाऱ्यांनी उर्जा विभागाला सादर केला फेरमूल्यांकनाचा अहवाल

मुंबई :- मंत्रालयाच्या समोर विष प्राशन केलेल्या वयोवृद्ध शेतकरी धर्मा पाटील यांच्या कुटुंबीयांना ५४ लाख रुपयांचा मोबदला मिळणार आहे. पाटील यांच्या जमिनीच्या फेरमुल्यांकनाचा अहवाल जिल्हाधिकाऱ्यांनी ऊर्जा विभागाला सादर केला असून त्यात ५४ लाखांची रक्कम पाटील कुटुंबियांना देण्याची शिफारस करण्यात आली आहे. वारंवार न्याय मागूनही न्याय मिळत नसल्याने पाटील यांनी मंत्रालयात विषप्राशन केले होते आणि उपचारादरम्यान त्यांचा मृत्यू झाला होता. यानंतर राज्यात एकच खळबळ उडाली होती. पाटील यांच्या पाच एकर जमिनीसाठी ५४ लाख रुपये मोबदला देण्याची शिफारस अहवालात करण्यात आली आहे. यापूर्वीचा पंचनामा रद्द करुन रोपांच्या संख्येनुसार सानुग्रह अनुदान ग्राह्य धरण्यात येणार आहे.

इतर १२ शेतकऱ्यांनाही वाढीव मोबदला
मनरेगा कायद्यातील तरतुदीप्रमाणे धर्मा पाटील यांच्या नावे २८ लाख ५ हजार ९८४ रुपये तर त्यांचे पुत्र नरेंद्र पाटील यांना २६ लाख ४२ हजार १४८ रुपयांचा मोबदला मान्य करण्यात आला आहे. इतर १२ प्रकल्पबाधित शेतकऱ्यांनाही वाढीव मोबदला मिळणार आहे. धुळे जिल्ह्यात होणाऱ्या औष्णिक वीज प्रकल्पात त्यांची पाच एकर जमीन संपादित करण्यात आली होती. मात्र पाच एकराच्या बदल्यात त्यांना केवळ चार लाख रुपये भरपाई देण्यात आली होती. धर्मा पाटील यांच्या चार एकर जमिनीत आंब्याची ६०० झाडे होती. विहीर, ठिबक सिंचन आणि वीज अशी बागायती शेती असलेल्या धर्मा पाटील यांना केवळ ४ लाखांचा मोबदला देण्यात आल्याने ते हताश झाले होते. इतर शेतकऱ्यांच्या तुलनेत भरपाई कमी मिळाल्याबाबत धर्मा पाटील यांनी गेल्या तीन महिन्यांपासून पाठपुरावा सुरू केला. मात्र त्यांना अधिकारी आणि संबंधित मंत्रालयाकडून योग्य उत्तरे मिळत नव्हती. संपादित जमिनीच्या मोबदल्यासाठी मंत्रालयात खेटे घालणाऱ्या धर्मा पाटील यांनी २२ जानेवारीला मंत्रालयात विष प्राशन केले होते. पाटील यांच्या मृत्यूनंतर जाग आलेल्या सरकारने त्यांच्या कटुंबियांना १५ लाखाचे सामुग्रह अनुदान देऊ केले होते. मात्र अनुदान नको, आम्हाला मोबदला द्या, अशी मागणी पाटील कुटुंबाने लावून धरली होती.