धावत्या एसटीत चालकाला अटॅक

पुणे । पुणे-बंगळुरू राष्ट्रीय महामार्गावर खंडाळा तालुक्यातील पारगाव हद्दीत स्वारगेट ते कोल्हापूर जाणार्‍या एसटी बसच्या चालकास गाडी चालवत असतानाच हृदयविकाराचा झटका आला. यामुळे झालेल्या अपघातात दोन प्रवासी किरकोळ जखमी झाले. एका प्रवाशाच्या समयसूचकतेमुळे मोठी दुर्घटना टळली.

दोन प्रवासी किरकोळ जखमी
राष्ट्रीय महामार्गावरून निघालेली कोल्हापूर आगाराची बस (एमएच 14 बीटी 4785) ही खंडाळा तालुक्यातील पारगाव गावच्या हद्दीत आली असता चालक भारत तुळशीदास होवाळ (रा. हातकणंगले) यांना झटका आला. त्यामुळे त्यांचा एसटीवरील ताबा सुटला. समोरील गॅसच्या टँकरला एसटी घासताच शेजारी बसलेल्या रमेश वाळके या प्रवाशाने उठून गाडीचा ब्रेक दाबला. त्यामुळे मोठा अनर्थ टळला. गाडीतील किरकोळ जखमी दोन प्रवासी वगळता 55 जण सुखरूप राहिले. या अपघातात विलास सूर्यवंशी व मालू वाळके दोघे जखमी झाले.