धुळ्यात अतिक्रमण हटवण्यापूर्वीच जेसीबी मशीन फोडले

पोलिसांनी वाढवला बंदोबस्त ; सेनेचे रात्रभर भजन आंदोलन

धुळे- शहरातील पांझरा नदी किनारी ट्रॅव्हल्स पॉईंटजवळ असलेल्या धार्मिक स्थळ हटविण्यासंदर्भात प्रशासकीय नियोजन केले होते याची माहिती मिळताच मंदिर परिसरात शिवसेनेने रात्री भजन आंदोलन सुक्षु केले. रविवारी रात्री मोठ्या प्रमाणावर जमाव एकवटला होतातर सोमवारी पहाटे अज्ञातानी जेसीबी मशीन फोडल्याने तणावाची स्थिती निर्माण झाली. मंदिर परीसरात आता पोलिसांचा बंदोबस्त तैनात करण्यात आला आहे. शहरातील पांझरा नदीकाठच्या दोन्ही बाजूस प्रत्येकी साडेपाच किमी रस्त्यांची कामे प्रगतीपथावर आहे. त्यामुळे या रस्त्यांना अडथळा ठरणारी धार्मिक स्थळे हटविण्याचे काम सध्या हाती घेण्यात आले आहे. त्यानुसार सोमवारी पहाटे कालिका माता मंदिर जमीनदोस्त केले जाणार होते. पोलिसांनी त्यादृष्टीने नियोजन केले होते. धार्मिक स्थळावर सुरू असलेल्या कारवाईमुळे आमदार अनिल गोटे व शिवसेनेमध्ये वाद उद्भवला आहे. त्यामुळे अशा परिस्थितीत कारवाईमुळे तणाव निर्माण होऊ नये, यासाठी मध्यरात्रीच कारवाईला सुरूवात झाली होती. अशी स्थिती एकीकडे असताना मंदिर परीसरात शिवसेनेच्या पदाधिकार्‍यांसह कार्यकर्त्यांनी गर्दी केली होती. निर्माण होत असलेला तणाव लक्षात घेता सोमवारी पहाटे पोलिसांचा बंदोबस्त लावण्यात आला होता. यातून जेसीबी फोडल्यामुळे तणाव अधिकच वाढला. परीणामी पोलिसांचा बंदोबस्त वाढविण्यात आला असून सध्या या ठिकाणी तणावपुर्ण शांतता आहे. अतिक्रमण काढण्यास अद्याप सुरुवात झालेली नाही.