धुळ्यात जीर्ण इमारत कोसळली; सुदैवाने जिवीतहानी टळली

धुळे । दोन दिवसापासून सूरू असलेल्या संततधार पावसामुळे आग्रारोडवरील कराचीवाला खुंट परिसरातील सुमारे सव्वाशे वर्ष जुनी जीर्ण इमारत मंगळवारी सकाळी आठ वाजता अचानक कोसळली. या इमारतीत कुणीही राहत नसल्याने जिवीतहानी टळली असली तरी मोठे नुकसान झाले आहे. या घटनेनंतर आग्रारोडवरील वाहतूक सकाळी बंद करण्यात आली होती. शहरातील आग्रारोडवरील कराचीवाला खुंट चौकात कोपर्‍यावर डॉ. मनोज जोशी यांच्या मालकीची तीन मजली जीर्ण इमारत मंगळवारी सकाळी अचानक कोसळली. सोमवारी रात्रीपासून सुरू असलेल्या संततधार पावसामुळे ही विटामातीचे बांधकाम असलेली इमारत कोसळली. या इमारतीत असलेल्या तीन दुकानांमधील साहित्याचे नुकसान झाले आहे़.

भाडेकरूंनी याप्रकरणी आधीच न्यायालयात धाव घेतल्याने इमारतीचा वाद न्यायप्रविष्ट आहे. दरम्यान, इमारत कोसळल्यानंतर मोठा आवाज झाल्याने आजुबाजूच्या परिसरातील नागरिकांनी घटनास्थळी गर्दी केली. मनपाच्या अतिक्रमण विभाग व शहर वाहतूक पोलीसांनी तत्काळ घटनास्थळ गाठत अग्निशमन बंब, पोलीस वाहने आडवी लावून आग्रारोडवरील वाहतूक बंद केली. पावसाळयापूर्वी या जीर्ण इमारतीला मनपाने नोटीस दिली होती. शिवाय न्यायालयाच्या निकालानंतर ती पाडण्याचे प्रयोजनही होते. परंतु तत्पूर्वीच इमारत जमिनदोस्त झाली अशी माहिती इमारतीचे मालक डॉ. मनोज जोशी यांनी दिली. इमारत कोसळल्याने लाखोंचे नुकसान झाले आहे. या घटनेनंतर त्याठिकाणी बघ्यांची गर्दी झाली होती.