धोनीला हायकोर्टाचा दिलासा!

नवी दिल्ली । एका सुप्रसिद्ध मासिकाच्या मुखपृष्ठावर छापण्यात आलेल्या विष्णूच्या रूपात दिलेल्या वादग्रस्त जाहिरातीप्रकरणात भारताचा माजी कर्णधार महेंद्रसिंग धोनीला दिलासा मिळाला आहे. धोनीविरुद्ध दाखल करण्यात आलेली याचिका सर्वोच्च न्यायालयाने फेटाळून लावली आहे. एका मासिकाने त्याला भगवान विष्णूच्या रूपात दाखवले होते. त्यात दोनीच्या हातात विविध कंपन्यांचे प्रॉडक्ट दाखवण्यात आले होते.

भावना दुखावण्याचा उद्देश नाही
सर्वोच्च न्यायालयाने या प्रकरणात संबंधित मासिकाच्या संपादकावरही धार्मिक भावना भडकावल्याचा खटला चालू शकत नसल्याचे सांगत संबंधित याचिका फेटाळून लावली. न्यायमूर्ती दीपक मिश्रा, ए. एम. खानविलकर आणि एम.एम.शांतानागोदर यांनी हा निर्णय दिला. तसेच धोनीवर याप्रकरणी याचिका चालवल्यास तो न्यायाचा उपहास ठरेल, कारण त्याने कुणाच्याही भावना दुखावण्याच्या हेतूने हे कृत्य केले नव्हते, अशी टिप्पणी न्यायमूर्तींनी केली. भारतीय दंड विधान 295 अ अनुसार या प्रकरणात आरोप दाखल होऊ शकत नाही असेही न्यायमूर्तींनी स्पष्ट केले.

उच्च न्यायालयाच्या निर्णयाला आव्हान
याप्रकरणी धोनी आणि अन्य व्यक्तींविरोधात आंध्र प्रदेशमधील अनंतपूर येथील न्यायालयात याचिका दाखल करण्यात आली होती. त्यानंतर गतवर्षी 5 सप्टेंबर रोजी सर्वोच्च न्यायालयाने या प्रकणातील सर्व आरोपींविरोधात बंगळुरूतील कनिष्ठ न्यायालयात सुरू असलेली धार्मिक भावना दुखावल्याची याचिका रद्द ठरवली होती. या प्रकरणी फौजदारी स्वरूपाची कारवाई करण्याची मागणी करणारी याचिका रद्द करण्यास कर्नाटक उच्च न्यायालयाने नकार दिला होता. त्यानंतर सर्वोच्च न्यायालयात विशेष अनुमती याचिका दाखल करून या प्रकरणी कर्नाटक उच्च न्यायालयाच्या निर्णयाला आव्हान दिले होते. गेल्या वर्षभरापासून या प्रकरणावर सुप्रीम कोर्टात सुनावणी सुरू होती. याआधी कोर्टाने धोनीवरील फौजदारी कारवाईला स्थगिती दिली होती. त्यानंतर आज झालेल्या सुनावणीत कोर्टाने धोनीविरुद्धची याचिकाच रद्द ठरवली.

देवी-देवतांचा अवमान?
एका मासिकाच्या एप्रिल 2013 च्या अंकामध्ये धोनीचे भगवान विष्णूच्या रुपातील छायाचित्र प्रसिद्ध झाले होते. त्यामध्ये एक बूटही दाखविण्यात आला होता. या जाहिरातीमुळे मोठा वाद निर्माण झाला. जाहिरातीतून धोनीने देशातील जनतेच्या धार्मिक भावना दुखावल्याची तक्रार जयकुमार हिरेमठ या सामाजिक कार्यकर्त्याने अतिरिक्त मुख्य महानगर दंडाधिकार्‍यांकडे केली होती. याची दखल घेऊन देवी-देवतांचा अवमान करून धार्मिक भावना दुखावल्याप्रकरणी कलम 295 अंतर्गत धोनीविरोधात तक्रार दाखल करण्यात आली होती. धोनीला न्यायालयात उपस्थित राहण्याचे समन्स देखील धाडण्यात आले होते. त्यानंतर धोनीने त्याविरोधात कर्नाटक उच्च न्यायालयात आणि नंतर सर्वोच्च न्यायालयात धाव घेतली होती.