नीट परीक्षेसाठी ड्रेसकोड! शूज, बेल्ट घालून येऊ नका

सीबीएसईचे नोटिफिकेशन जारी

नवी दिल्ली : सीबीएसईने नीट 2018 परीक्षेचे अ‍ॅडमिट कार्ड जारी केल्यानंतर आता विद्यार्थ्यांसाठी परीक्षेच्या दिवशी ड्रेसकोडसह कडक नियमावली जारी केली आहे. परीक्षार्थींनी हाफ स्लीव्हचा फिकट रंगाचा शर्ट घालावा. तसेच परीक्षेला घड्याळ, बेल्ट, शूज घालून येऊ नये, अशा अटी घालण्यात आल्या आहेत. मागील वर्षी नीट परीक्षेसाठी ड्रेसकोड निर्धारित केला होता. त्यानंतर सीबीएसईविरूद्ध संताप व्यक्त करण्यात आला होता. या वादापासून वाचण्यासाठी यंदा सीबीएसईने महिला आणि पुरुष विद्यार्थ्यांसाठी ड्रेसकोड जारी केला आहे.

विद्यार्थ्यांना मनस्ताप होणार
परीक्षेच्या दिवशी हाफ स्लीव्हचे फिकट रंगाचे कपडे घालून या, कपड्यांवर कोणत्याही प्रकारची बटणे लावलेली नसावीत, मुलींनी अ‍ॅम्ब्रोयडरी असलेले ड्रेस परिधान करु नयेत, परीक्षेच्या दिवशी शूज घालून येऊ नका, स्लिपर्स किंवा कमी उंचीच्या सँडल्स चालतील, बुरखा, पगडी परिधान करणार्‍या विद्यार्थ्यांनी परीक्षा सुरु होण्याच्या एक तास आधी परीक्षा केंद्रांवर पोहोचायला हवे, विद्यार्थ्यांनी कोणत्याही प्रकारची स्टेशनरी किंवा इलेक्ट्रॉनिक डिव्हाईस घेऊन येऊ नये, विद्यार्थ्यांना पेन, पेन्सिलसोबतही एक्झाम हॉलमध्ये प्रवेश दिला जाणार नाही, परीक्षा केंद्रावर दागिने, हॅण्डबॅग, पाण्याची बाटलीही घेऊन येऊ नये, परीक्षेला अ‍ॅडमिट कार्ड आवश्यक आहे, त्याशिवाय कोणत्याही विद्यार्थ्याला परीक्षा केंद्रावर प्रवेश दिला जाणार नाही, अशा अटी सीबीएसईने घातल्याने विद्यार्थ्यांना पुन्हा मनस्तापाला सामोरे जावे लागणार आहे. देशभरामध्ये 6 मे रोजी सकाळी 10 ते दुपारी 1 पर्यंत नीटची परीक्षा होणार आहे. कोणत्याही परिस्थितीत परीक्षेच्या तारखेत आणि वेळेत बदल होणार नाही, असे सीबीएसईने स्पष्ट केले आहे. परीक्षेचा निकाल 5 जूनरोजी जाहीर होईल. त्या पार्श्वभूमीवर सीबीएसईने नियमावली प्रसिद्ध केली आहे.