न्यूझीलंडच्या मिचेल मॅकलेनघनची मुंबई इंडियन्समध्ये घरवापसी

मुंबई । आयपीएलच्या 11व्या सत्रातील सामन्यांना 7 एप्रिलपासून सुरुवात होणार आहे. पहिल्या सामन्यामध्ये आयपीएलची मागील वर्षाचे विजेते मुंबई इंडियन्सचा सामना चेन्नई सुपरकिंग्जशी होईल. आयपीएल सुरू व्हायच्या आधीच मुंबईच्या संघामध्ये न्यूझीलंडच्या मिचेल मॅकलेनघनचे पुनरागमन झाले आहे. जेसन बेहरनड्रॉफला दुखापत झाल्यामुळे मुंबई इंडियन्सने त्याच्याऐवजी मॅकलेनघनला संघामध्ये घेतले आहे. बेहरनड्रॉफला पाठीची दुखापत झाल्यामुळे तो पूर्ण आयपीएल खेळू शकणार नाही. 2015, 2016 आणि 2017 सालच्या आयपीएलमध्ये मॅकलेनघन मुंबईच्या संघामध्ये होता.

2017 साली मॅकलेनघनने 14 सामन्यामध्ये 19 विकेट घेतल्या होता. हा मॅकलेनघनचा सगळ्यात यशस्वी मोसम होता. 2016 साली मॅकलेनघनने 14 सामन्यामध्ये 17 विकेट घेतल्या तर 2015मध्ये त्याने 12सामन्यांमध्ये 18 विकेट घेतल्या. यंदाच्या मोसमामध्ये मुंबईने मॅकलेनघनला 1 कोटी रुपये देऊन विकत घेतले आहे. 31 वर्षांचा मॅकलेनघन मार्च 2016 साली न्यूझीलंडकडून शेवटचा आंतरराष्ट्रीय सामना खेळला. नुकत्याच झालेल्या पाकिस्तान सुपरलीगमध्ये मॅकलेनघन लाहोर कलंदर्सकडून खेळला.