मावळातील तीन हजार शिवसैनिक पंढरपूर सभेत होणार सहभागी

आकुर्डी : शिवसेना पक्षप्रमुख उद्धव ठाकरे यांची 24 डिसेंबर रोजी पंढरपूर येथे जाहीर सभा होणार आहे. या सभेत शिवसेना जोरदार शक्तिप्रदर्शन करणार आहे. सभेसाठी पाच लाख शिवसैनिक जमणार असल्याचे उद्दिष्ट शिवसेनेने ठेवले आहे. मावळ लोकसभा मतदार संघातील तीन हजार शिवसैनिक मावळ आणि पिंपरी-चिंचवड परिसरातून वाहणार्‍या पाच नद्यांचे जल विठ्ठल चरणी अर्पण करून सभेत सहभागी होणार आहेत. याबाबतची नियोजन बैठक शुक्रवारी आकुर्डी येथील शिवसेना भवनात झाली. या बैठकीमध्ये शहरातील नेत्यांनी कार्यकर्त्यांना सभेसाठी जमण्याबद्दल सांगितले.

नियोजन बैठक मावळ लोकसभा मतदार संघाचे खासदार श्रीरंग बारणे, आमदार गौतम चाबुकस्वार यांच्या मार्गदर्शनाखाली जिल्हाप्रमुख गजानन चिंचवडे यांच्या उपस्थितीत पार पडली. जिल्हा संघटिका शादान चौधरी, शहर प्रमुख योगेश बाबर, शहर संघटिका अ‍ॅड. उर्मिला काळभोर, विधानसभा प्रमुख प्रमोद कुटे, अनंत को-हाळे, राजू खांडभोर, विधानसभा संघटिका सरिता साने, अनिता तुतारे, शैला खंडागळे आदींनी पुढील कामकाजाचे नियोजन केले आहे.