पालघरमध्ये ७ टक्के मतदान

पालघर: संपूर्ण राज्याचे लक्ष लागलेल्या पालघर लोकसभा पोटनिवडणुकीसाठी आज मतदान होत आहे. सकाळी ७ वा मतदान सुरु झाले असून, संध्याकाळी ६ वाजेपर्यंत मतदान करता येणार आहे. तर ३१ मे रोजी या निवडणुकीचा निकाल जाहीर होईल. सकाळी ९ वाजेपर्यंत पालघरमध्ये ७ टक्के मतदान झाले आहे. पालघरमध्ये सत्ताधारी भाजप विरुद्ध शिवसेना विरुद्ध काँग्रेस विरुद्ध बहुजन विकास आघाडी अशी लढत होत आहे. मात्र भाजप आणि शिवसेनेने ही निवडणूक अत्यंत प्रतिष्ठेची केली आहे. भाजपचे खासदार चिंतामण वनगा यांच्या निधनाने पालघरमध्ये पोटनिवडणूक होत आहे.

पालघर लोकसभा पोटनिवडणुकीत भाजपाकडून काँग्रेसमधून आलेले राजेंद्र गावित, शिवसेनेकडून श्रीनिवास वनगा,काँग्रेसकडून दामोदर शिंगडा, माकपाकडून किरण गहला, बहुजन विकास आघाडीकडून बळीराम जाधव आणि इतर चार अपक्ष उमेदवार आहेत. शिवसेना-भाजपने पालघर पोटनिवडणूक प्रतिष्ठेची केली आहे. त्यामुळे सगळ्यांचेच लक्ष या निवडणुकीकडे लागले आहे.