पिंपरी-चिंचवड महापालिका उपनगरांमध्ये खासगी वाहनांची घुसखोरी

लहान उपनगरांमध्येही थाटले आहे बस्तान

पिंपरी : पिंपरी-चिंचवड ही उद्योग नगरी झाली आहे. त्यामुळे देशाच्या काना-कोपर्‍यातून येथे नागरिक येत असतात. मजुरीपासून ते अगदी आयटी इंजिनिअरपर्यंत सर्वांचीच पिंपरी-चिंचवड शहराला पसंती असते. त्यामुळे दिवसेंदिवस येथील नागरिकीकरण वाढते आहे. सर्वच सुविधांवर परिणाम होत आहे. बस वाहतूक, पाणीपुरवठा, वीज आदी सर्वच गोष्टींवर ताण येतो आहे. त्यामुळे अनेक गोष्टी बेकायदेशीररित्या सुरू असतात. त्यापैकीच एक म्हणजे अवैध प्रवासी वाहतूक. शहर व उपनगर परिसरात बेकायदेशी वाहतूक आता जवळपास बेलगाम झाली आहे. केवळ सामान्य नागरिकांच्या कागदपत्रांची कसून तपासणी करणार्‍या वाहतूक पोलीस विभाग आणि आरटीओने बेकायदेशीर प्रवासी वाहतूक करणार्‍या खासगी बस आणि अन्य वाहनांकडे सपशेल डोळेझाक करत आहेत. त्यातच अलीकडेच झालेल्या एसटी कर्मचार्‍यांचा संप खासगी वाहतुकदारांच्या जणू काही पथ्यावरच पडला आहे.

लांब पल्ल्याची खासगी बसने मुख्य रस्त्यावर थांबून प्रवाशांना सुविधा देणे स्वाभाविक आहे. परंतु आता या खासगी बस लहान-लहान रस्ते असलेल्या उपनगरांमध्ये घुसखोरी करू लागल्या आहेत. खासगी बसवाले जास्त प्रवासी मिळविण्याच्या हव्यासापोटी जास्त प्रयत्न करतात. निगडी परिसरातील पवळे पुल, नाशिक फाटा अशा वर्दळीच्या ठिकाणी प्रवाशांसाठी थांबतात. याच परिसरात या बस दिवसभर उभ्या असतात तर सायंकाळी येथूनच भरल्या जातात. सरकारी रस्त्यांवर, सरकारी जागेत, पुलाखाली या व्यावसायिक बसेसच फुकट पार्किंग सुरु आहे.

वाहतूक कोंडीचे कारण
शहरातील अगदी लहान उपनगरेदेखील खासगी बसचा अड्डा बनली आहेत. सायंकाळ होताच महामार्गाशेजारील दापोडी ते निगडी आणि नाशिक फाटा ते भोसरीपर्यंत सर्वत्र खासगी बसचे डझनभर थांबे आहेत. यामुळेच वाहतूक कोंडीत भर पडत असते. दुसरीकडे महामार्गांपासून दूर असलेल्या आंतरिक भागातील गावांमध्ये देखील खासगी बसची घुसखोरी वाढू लागली आहे. नवी सांगवी परिसरात सायंकाळच्या वेळी किमान दोन डझनहून अधिक खासगी बस प्रवेश करतात. तर काही बस दिवसभर मोकळ्या मैदानात रस्त्याच्या कडेला उभ्या असतात. आधीच लहान असलेले रस्ते आणि चौकांचा या बसेसमुळे श्‍वास कोंडत आहे. रोज सायंकाळी सहा नंतर विदर्भ आणि मराठवाड्याच्या दिशेने जाणार्‍या प्रवाशांसाठी खासगी बसच्या लांबच्या लांब रांगा येथे लागताना दिसत आहेत.

खासगी बसला परवानगी कशी?
सांगवी परिसरात रोज सायंकाळी या खासगी बसचा त्रास स्थानिक नागरिकांना सहन करावा लागत आहे. याबाबत तक्रार कुणाकडे करावी, असाही प्रश्‍न आता नागरिकांना पडला आहे. कारण या थेट सांगवी पोलीस ठाण्याची वाट अडवून उभ्या असतात. जर या बस मालक आणि चालकांचे एवढे धाडस होत असेल तर नक्कीच यांना मोठे पाठबळ लाभले आहे. गेल्या कित्येक वर्षांपासून हा प्रकार सुरू आहे आणि कुणीच या विरोधात आवाज उठवत नाही. पीडब्लुडीचे मैदान, साई चौकाचा रस्ता जिकडे तिकडे खासगी बस उभ्या असतात. या लहानशा गावात आणि दाट लोकवस्तीत जिथे महाराष्ट्र राज्य मार्ग परिवहन मंडळाची एसटी बस येऊ शकत नाही, तिथे खासगी ट्रॅव्हल्सच्या बसला परवानगी कशी काय मिळते असा सवाल स्थानिक नागरिक करत आहेत.

भोसरीत अवैध पार्किंग
येथे कित्येक प्रमुख रस्त्यांवर खासगी बसवाल्यांनी कब्जा केला आहे. जणू काही हे रस्ते या बसमालकाचे अधिकृत पार्किंग असल्याप्रमाणे येथे खासगी बस पार्क केल्या जात आहेत. यामुळे बर्‍याचदा वाहतुकीसाठी अर्धा रस्तादेखील शिल्लक राहत नाही. यामुळे वाहतूक कोंडीसोबतच अपघातांचा धोका देखील वाढला आहे. वाहतूक पोलीस विभाग मात्र बघ्याचीच भूमिका घेत असल्याचे स्थानिक रहिवाश्यांची तक्रार आहे. भोसरी परिसरात नोकरदार वर्ग खूप मोठ्या प्रमाणात वास्तव्यास आहे. बहुतांश लोक हे मराठवाडा, विदर्भ येथून रोजगारासाठी आले आहेत. पण नेहमीच आपल्या मूळगावी जावे लागत असल्यामुळे खासगी बस मालकांनी भोसरीला बसअड्डा बनविला आहे. लांडेवाडी चौकापासून राजमाता जिजाऊ महाविद्यालयाजवळील नाशिक महामार्गाकडे जाणारे सर्व रस्ते, कै. अंकुशराव लांडगे नाट्यगृहाजवळील रस्ते, धावडेवस्ती जवळील रस्ता तर साईसागर हॉटेल समोरील रस्ता असे आहेत. याच मार्गांचा भोसरीतील नागरीक मोठ्या प्रमाणात वापर करत असतात.