पुढचा अध्यक्ष गांधी कुटुंबाबाहेरचा!

सोनिया गांधी यांचे संकेत

नवी दिल्ली : भविष्यात नेहरू किंवा गांधी घराण्याबाहेरची व्यक्ती काँग्रेसच्या अध्यक्षपदी विराजमान होऊ शकते, असे संकेत संयुक्त पुरोगामी आघाडीच्या (यूपीए) अध्यक्षा सोनिया गांधी यांनी दिले आहेत. हे संकेत देताना सोनिया गांधी यांनी मनमोहन सिंग यांचे उदाहरण दिले. सोनिया म्हणाल्या, 2004 मध्ये पंतप्रधान म्हणून मनमोहन सिंग यांची निवड करण्यात आली. कारण या पदासाठी ते माझ्यापेक्षा अधिक योग्य होते.

नेत्यांची निवड लोकशाही पद्धतीने!
राजकीय घराणेशाहीबद्दल बोलताना सोनिया गांधी म्हणाल्या, काँग्रेस पक्षाला एक मोठी परंपरा आहे. या परंपरेनुसार संघटनेतील नेत्यांची निवड लोकशाही पद्धतीने केली जाते. यावेळी सोनिया यांनी अमेरिकेतील बुश आणि क्लिटंन परिवाराचा उल्लेख दिला. तसेच भारतामधीलही काही राज्यांतील घराणेशाहीच्या इतिहासाचा दाखला दिला. यूपीएच्या काळात मनमोहन सिंग यांना कोणतेही अधिकार नव्हते, या विधानाचे खंडन करताना सोनिया गांधी म्हणाल्या, मनमोहन सिंग पंतप्रधान असूनही त्यांना निर्णय घेण्याचा अधिकार नव्हता, अशी चर्चा होते. मात्र, तशी परिस्थिती कधीच नव्हती. मी राजकारणात येण्याचा निर्णय घेतला तेव्हा काँग्रेस अत्यंत बिकट परिस्थितीतून मार्गक्रण करत होती. अनेकांनी काँग्रेसची साथ सोडली होती. मात्र, मी पक्षासाठी काहीच केले नाही तर तो भ्याडपणा ठरेल, या विचाराने मी राजकारणात प्रवेश केला होता.