पुण्याचा सर्वेश दिल्लीत चमकला!

नवी दिल्ली । पुण्यातील सर्वेश नावंदे यास वायुदल विंगचा सर्वोत्कृष्ट कॅडेटचे सुवर्ण पदक पंतप्रधान नरेंद्र मोदी यांच्या हस्ते प्रदान करण्यात आले. दिल्लीतील छावणी भागातील करीअप्पा परेड ग्राउंडवर पंतप्रधान नरेंद्र मोदी यांच्या उपस्थितीत पंतप्रधान रॅलीचे आयोजन करण्यात आले होते. या कार्यक्रमात सर्वोत्कृष्ट कॅडेट्सना पुरस्काराने सन्मानित करण्यात आले. यावेळी संरक्षणमंत्री निर्मला सितारमन, संरक्षण राज्यमंत्री सुभाष भामरे, लष्कर प्रमुख जनरल बिपीन रावत, वायुसेना प्रमुख ऍडमिरल सुनील लांभा, नौसेना प्रमुख चिफ मार्शल बिरेंद्र सिंग धनोआ आदी उपस्थित होते.

राज्यांच्या निवडक पथकांचे पथ संचलन
पंतप्रधान मोदी यांनी या कार्यक्रमात उपस्थित देशभरातील कॅडेटसना संबोधित केले. कार्यक्रमाच्या सुरूवातीस पंतप्रधानांना मानवंदना देण्यात आली. मानवंदना देण्यार्‍या देशभरातील 17 एनसीसी संचालनालयाच्या चार दलातील निवडक कॅडेटसचा समावेश होता. पंतप्रधानांनी मानवंदना देणार्‍या एनसीसी पथकाची पाहणी केली. यानंतर शिबीरात सहभागी प्रत्येक राज्यांच्या निवडक पथकांचे पथ संचलन झाले.

मॉडर्न कॉलेजचा विद्यार्थी
एनसीसीच्या श्रेणी अंतर्गत पुण्याच्या सर्वेश सुभाष नावंदे यास वायुदल विंगचा सर्वोत्कृष्ट कॅडेटचे सुवर्ण पदक पंतप्रधान मोदी यांच्या हस्ते प्रदान करण्यात आले. सर्वेश हा 19 वर्षांचा असून तो मॉडर्न कॉलेज येथे बीएससी द्वितीय वर्षाचे शिक्षण घेत आहे. प्रजासत्ताक दिन 2018च्या राजपथावरील पथसंचलनासाठी सहभागी होण्यासाठी त्याने पुणे येथे नाव नोंदविले. नोव्हेंबर 2017 मध्ये पुणे विभागातून औरंगाबाद येथील पुढील शिबीरासाठी सर्वेशची निवड झाली. यानंतर एनसीसी शिबीरामध्ये होणार्‍या अंतर्गत स्पर्धांमध्ये तो उत्तीर्ण होत गेला. एनसीसीचे महासंचालक यांनीही सर्वेशचा ट्रॉफी देऊन सत्कार केला.

एनसीसी महासंचालनालय आणि दिल्ली संचालनालयाच्यावतीने येथील करीअप्पा परेड ग्राऊंडवर प्रजासत्ताक दिनानिमित्त देशभरातील एनसीसी कॅडेटसाठी शिबिराचे आयोजन करयात येते. 6 जानेवारी पासून या शिबिराला सुरुवात झाली. उपराष्ट्रपती वैंकय्या नायडू यांच्या हस्ते या शिबिराचे उदघाट्न झाले. तर प्रधामंत्रीरॅलीने रविवारी या शिबिराची सांगता झाली. देशभरातील 17 एनसीसी संचालनालयाचे कॅडेट्स यात सहभागी झाले. महाराष्ट्रातील 112 एनसीसी कॅडेटस या शिबिरात सहभागी झाले. यातील काही कॅडेटसची प्रजासत्ताक दिनी राजपथावरील पथसंचलनासाठी तर काही कॅडेटसची प्रधानमंत्री रॅलीमधे मानवंदना देण्यासाठी निवड झाली.