पुण्याच्या नियोमी डे ठरल्या ’मिसेस महाराष्ट्र 2018’
पुणे : गृहिणी असलेल्या पुण्याच्या नियोमी डे यांनी उल्लेखनीय सादरीकरण करत ‘मिसेस महाराष्ट्र 2018’ स्पर्धेवर आपले नाव कोरले आहे. कुटुंबातील सर्वांकडूनच प्रोत्साहन मिळाल्याने हा सन्मान मिळवू शकले, अशी भावना नियोमी डे यांनी पत्रकारांशी बोलताना व्यक्त केली. याप्रसंगी नियोमी यांच्या आई मेघना खांडेकर, दिवा पेजेंटचे अंजना मास्कारेन्हास आणि कार्ल मास्कारेन्हास आदी उपस्थित होते.
दिवा पेजेंटतर्फे ‘मिसेस महाराष्ट्र 2018’ स्पर्धेचे पुण्यात नुकतेच आयोजन करण्यात आले होते. घर सांभाळतानाही आपण महिला सक्षमपणे आपल्यातील कलागुणांना वाव देऊ शकतो, हे या स्पर्धेतून सिद्ध झाले.
स्पर्धेत 300 महिलांचा सहभाग
तत्पूर्वी, राज्यातून पुणे, मुंबई, नाशिक, नागपूर आणि कोल्हापूर येथून निवड चाचणी घेण्यात आली होती. जवळपास 300 महिलांनी या स्पर्धेत सहभाग घेतला होता. ओळख परेड, रॅम्प वॉक, प्रश्‍नोत्तरे आदी निकषांवर ही निवड करण्यात येते. या स्पर्धेच्या अंतिम फेरीत राज्यभरातून 40 स्पर्धक सहभागी झाले होते. त्यामध्ये 20 ते 33 या वयोगटात (सिल्व्हर कॅटेगरी) 20 स्पर्धक, तर 33 च्या पुढे (गोल्ड कॅटेगरी) 20 स्पर्धकांचा समावेश होता. नियोमी या ज्येष्ठ पत्रकार सुकृत खांडेकर यांच्या कन्या, तर कर्नल सौरव नारायण डे यांच्या पत्नी आहेत