पुरंदरमध्ये राष्ट्रवादीचे राजीनामासत्र

सासवड । आगामी निवडणुका डोळ्यांसमोर ठेवून राष्ट्रवादी काँग्रेसमध्ये नवीन पदाधिकारी निवडीचे संकेत मिळताच पुरंदर तालुक्यात पक्षांतर्गत नाराजी समोर आल्याचे दिसत आहे. तालुक्यातील सर्वच जुन्या पदाधिकार्‍यांनी आपले राजीनामे जिल्हाध्यक्ष जालींदर कामटे यांच्याकडे दिल्याने राजकीय वर्तुळात खळबळ उडाली आहे. पुरंदर तालुका राष्ट्रवादी काँग्रेसचे विद्यमान अध्यक्ष शिवाजी पोमण, तालुका महिला अध्यक्ष गौरी कुंजीर, युवकचे अध्यक्ष पुष्कराज जाधव, विद्यार्थी काँग्रेसचे अध्यक्ष चेतन जाधवराव यांनी आपल्या पदाचे राजीनामे जिल्हाध्यक्ष कामठे यांच्याकडे दिले असून, एक प्रत ख. सुप्रिया सुळे यांना दिली आहे, अशी माहिती तालुका अध्यक्ष पोमण यांनी पत्रकार परिषद घेऊन दिली. सुळे यांना अपेक्षित असलेली तालुका संघटना बांधण्याच्या कामात भविष्यात पक्षाचे सच्चे कार्यकर्ते म्हणून अग्रभागी राहू, असे पोमण यांनी या वेळी सांगितले.

याप्रसंगी राजीनामे दिलेले पदाधिकारीही उपस्थित होते. आगामी निवडणुका डोळ्यांसमोर ठेवून राष्ट्रवादी काँग्रेसमध्ये मोठे फेरबदल होण्याचे संकेत आहेत. नुकतेच हल्लाबोल आंदोलन यशस्वी ठरले. त्यानंतर खासदार सुप्रिया सुळे यांचा गावभेट दौरा झाला. त्याच्या दुसर्‍याच दिवशी राजीनामे दिल्याने पक्षांतर्गत कार्यकर्त्यांमध्ये खळबळ उडाली आहे.

पुढच्या आठवड्यात पक्षाची बैठक
पुढील आठवड्यात पक्षाचे क्रियाशील सदस्यांची राज्य तसेच जिल्हा व राज्य प्रतिनिधी निवडीसाठी पक्ष निरीक्षक राजेंद्र कोरेकर यांच्या उपस्थितीत बैठक होणार असल्याचे समजते. यात काही नव्या कार्यकर्त्यांना संधी देण्यात येणार असून, काही जुन्या पदाधिकार्‍यांनाही कायम करण्यात येणार आहे.या पार्श्‍वभूमीवर पुरंदरमधील पदाधिकार्‍यांचे राजीनामे हे नाराजीनामे तर नाहीत ना, अशी चर्चा सुरू झाली आहे.