पेट्रोल-डीझेलचे दर कमी होण्याची शक्यता

नवी दिल्लीः आंतरराष्ट्रीय बाजारात क्रूड ऑइलच्या किमतीत सातत्याने घट होत असल्याने भारतात पेट्रोल आणि डिझेलच्या दरात घसरण होण्याची शक्यता वर्तवली आहे. कच्च्या तेलाचे दर 74 डॉलर प्रतिबॅरलवरून कमी होऊन 70 डॉलर प्रति बॅरलवर आला आहे. येत्या 15 ते 20 दिवसांत पेट्रोल आणि डिझेलचे दर घटण्याची शक्यता वर्तवली जात आहे. जगातली सर्वात मोठी रिसर्च फर्म बँक ऑफ अमेरिकेच्या मते, सौदी अरबकडून कच्च्या तेलाचे उत्पन्न वाढण्याची शक्यता असून, पुरवठाही वाढणार आहे. त्यामुळे कच्च्या तेलाचे भाव 70 डॉलर प्रति बॅरलच्याही खाली येऊ शकतात. त्या मुळे साहजिकच भारतात, कच्च्या तेलाच्या किमतीत घट झाल्यानंतर भारतीय अर्थव्यवस्थेला याचा मोठा फायदा होणार आहे. त्यामुळे पेट्रोल आणि डिझेलचे दर कमी होऊन सामान्य लोकांना मोठा फायदा पोहोचणार आहे.

अमेरिका आणि चीनमध्ये सुरू असलेल्या ट्रेड वॉरमुळेही तेलाच्या किमती पडू शकतात. त्यामुळे येत्या काही दिवसांत कच्या तेलाचे दर 70 डॉलर प्रतिबॅरलच्या खाली येऊ शकतात. गेल्या महिन्याभरापासून भारतात पेट्रोलचे दर 72 रुपये प्रतिलिटर ते 78 रुपये प्रतिलिटरच्या जवळपास आहे. तर डिझेलचा दर 69च्या आसपास आहे. जर कच्च्या तेलाचे दर 70 डॉलर प्रतिबॅरलच्या खाली आल्यास पेट्रोल-डिझेलचे दर 1 ते 2 रुपयांनी स्वस्त होऊ शकते.