प्रांताधिकार्‍यांच्या चिमुकल्याचा मृत्यू ः रेल्वे कंत्राटदारासह सुपरवायझर अटकेत

न्यायालयाने केली आरोपींची जामिनावर सुटका

भुसावळ- भुसावळचे प्रांताधिकारी श्रीकुमार चिंचकर यांचा पावणेदोन वर्षीय चिमुकला ओजसच्या मृत्यूप्रकरणी उर्वरीत दोघा आरोपींना मंगळवारी अटक करण्यात आली. 17 मार्च रोजी ही दुर्दैवी घटना घडल्यानंतर तीन आरोपींविरुद्ध गुन्हा दाखल करण्यात आला होता तर सुपर वायझर प्रवीण अग्रवाल यास अटक केल्यानंतर त्याची जामिनावर सुटका करण्यात आली होती. मंगळवारी शहर पोलिसांनी रेल्वेचे कंत्राटदार जयप्रकाश सुरजभान अग्रवाल (65) व रेल्वेचे सुपर वायझर सुभाषचंद्र अयोध्याप्रसाद शर्मा (52) यांना अटक केली. संशयीतांना भुसावळ अतिरीक्त सत्र न्यायालयात हजर केले असता आरोपींची जामिनावर सुटका करण्यात आली.

अशी घडली होती घटना
भुसावळचे प्रांताधिकारी श्रीकुमार चिंचकर रेल्वेच्या आरपीडी रोडवरील ताप्ती क्लबमध्ये शनिवार, 17 मार्च सायंकाळी पोहण्यासाठी गेल्यानंतर पावणे दोन वर्षीय चिमुरडा ओजस फॅन्सींग बनवण्यासाठी खोदण्यात आलेल्या खड्ड्यात पडून मृत झाला होता. दुर्घटना टळण्यासाठी कुठलेही फलक वा बोर्ड लावण्यात न आल्याने चिमुकला ओजस त्या खड्ड्यात खेळता-खेळता जावून पडल्याने त्याचा मृत्यू झाला होता. या प्रकरणी प्रांताधिकारी श्रीकुमार चिंचकर यांच्या फिर्यादीनंतर रेल्वेचे कंत्राटदार जयप्रकाश सुरजभान अग्रवाल (65), त्यांचा मुलगा तथा सुपरवायझर प्रवीण जयप्रकाश अग्रवाल व रेल्वेचे सुपर वायझर सुभाषचंद्र अयोध्याप्रसाद शर्मा (52) यांच्याविरुद्ध गुन्हा दाखल करण्यात आला होता. तपास शहर पोलीस ठाण्याचे प्रभारी निरीक्षक दीपक गंधाले व सहकारी करीत आहेत.