प्राथमिक आरोग्य केंद्रात डॉक्टरच नाहीत

भोर तालुक्यातील 5 प्राथमिक आरोग्य केंद्रे व 24 उपकेंद्रांची स्थिती बिकट

भोर : भोर तालुक्यात कोट्यवधी रुपये खर्चून प्राथमिक आरोग्य केंद्र, तसेच उपकेंद्र बांधण्यात आले. मात्र, सोयी-सुविधांचा अभाव, अपुरे कर्मचारी, अनेक आरोग्य उपकेंद्रात परिचारिका आठवड्यातून एक वेळाच उपस्थित राहतात. त्यात डॉक्टरही क्वचितच हजेरी लावत असल्याने रुग्णांना हेलपाटे मारत जावे लागत आहे. यामुळे तालुक्यातील 5 प्राथमिक आरोग्य केंद्रे व 24 प्राथमिक आरोग्य उपकेंद्रे दुर्लक्षित असल्याची स्थिती आहे.

भाटघर धरण खोर्‍यातील पांगारी येथे पुणे जिल्हा परिषदेचे प्राथमिक आरोग्य उपकेंद्र आहे. या दवाखान्याची इमारत चांगली बांधण्यात आली आहे. त्यात संरक्षक भिंत, पाण्याची सुविधा करण्यात आली आहे. दवाखान्यात पांगारी, डेहेण, कोंडगाव, साळुंगण, गोरेवस्ती व आजूबाजूच्या दुर्गम डोंगरी गावातील नागरिक दवाखान्यात उपचार घेण्यासाठी येतात. केवळ एक परिचारिकेची नेमणूक करण्यात आली आहे. तिला दुर्गम गावात जाऊन शासकीय कामे करण्याबरोबरच दुसर्‍या दवाखान्यातही काम करावे लागते, त्यामुळे त्यांना आठवड्यातून एकदाच दवाखान्यात येण्यास वेळ मिळतो. उपकेंद्रात वैद्यकीय अधिकारी कमी आहेत. अनेक महिने डॉक्टर दवाखान्याकडे फिरकत नसल्याने या ठिकाणी येणार्‍या रुग्णांना माघारी जावे लागते.

आरोग्य विभागाचे नसरापूर, आंबवडे, नेरे जोगवडी, भुतोंडे 5 प्राथमिक आरोग्य केंद्रे असून 3 ठिकाणी इमारती झाल्या आहेत. दोन ठिकाणी कोट्यवधी रुपये खर्चून इमारती बांधण्यात येत आहेत, तर 24 आरोग्य उपकेंद्रे असून यातील बहुतांशी केंद्रांना इमारती आहेत. वीज, पाणी, सर्व सुविधा देण्यात आल्या आहेत.

पुरेसे कर्मचारी देऊ

भोर तालुक्यातील ग्रामीण भागातील नागरिकांना चांगली आरोग्यसेवा मिळावी, म्हणून आरोग्य विभागात डॉक्टर, वैद्यकीय अधिकार्‍यांची नेमणूक करण्याबरोबर पुरेशा प्रमाणात कर्मचारी देण्यात येतील, असे जिल्हा परिषदेच्या बांधकाम तसेच आरोग्य विभागाचे सभापती प्रवीण माने यांनी सांगितले.