प्लास्टिक, थर्माकोलमुक्त शहरासाठी विशेष मोहीम
पालिका व पर्यावरण संवधर्न समितीचा पुढाकार
पिंपरी : पर्यावरणाची आणि नागरिकांच्या आरोग्याची हानी टाळण्यासाठी प्लास्टिकच्या पिशव्या, ग्लास, कप, प्लेटस्, बाटल्या इत्यादींच्या उत्पादनांवर तसेच वापरावर पूर्णपणे बंदी आणून, महाराष्ट्र प्लास्टिकमुक्त करण्याचा निर्णय राज्य सरकारने घेतला आहे. न्यायालयाने देखील या निर्णयास योग्य ठरवत बंदी कायम ठेवली. त्यानुसार पिंपरी-चिंचवड महापालिका आणि पर्यावरण संवर्धन समितीने प्लास्टिक आणि थर्माकोलमुक्त शहराचे मिशन हाती घेतले आहे. या मोहिमेला 19 एलिपासून सुरुवात होणार असून 21 एप्रिल दरम्यान चालणार्‍या या मोहिमेत प्लास्टिक, थर्माकोल संकलनाबरोबरच जनजागृती करण्यात येणार आहे.
महाराष्ट्र राज्य सरकारने प्लास्टिक कचरा व्यवस्थापन नियम 2016 अन्वये जारी केलेल्या अधिसूचनेनुसार सर्व प्रकारच्या प्लास्टिक पिशव्या, थर्माकोल (पॉलिस्टायरिन) व प्लास्टिकपासून बनविण्यात येणार्‍या व एकदाच वापरल्या जाणार्‍या डिस्पोजेबल वस्तू उदाहरणार्थ ताट, कप्स, ग्लास, काटे, वाटी, चमचे, भांडे इत्यादी, हॉटेल्समध्ये अन्न पदार्थ पॅकेजिंगसाठी वापरले जाणारे प्लास्टिक भांडे व वाटी, स्ट्रॉ, नॉन वोवन पॉलिप्रॉपीलीन बॅग्ज, द्रव पदार्थ साठविण्यासाठी वापरात येणारे प्लास्टिक पाऊच/कप, अन्नपदार्थ, धान्य साठविण्यासाठी व पॅकेजिंगसाठी वापरले जाणारे प्लास्टिक व प्लास्टिक वेष्टन या सर्व वस्तूंवर बंदी घालण्यात आली आहे. तसेच सजावटीसाठी देखील प्लास्टिक व थर्माकोलच्या वापरावर बंदी घातली आहे.
प्रभागनिहाय मोहीम सुरू
या पार्श्‍वभूमीवर पिंपरी-चिंचवड शहरात महापालिका आणि पर्यावरण संवर्धन समितीने प्रभागनिहाय मोहीम हाती घेतली आहे. त्यानुसार गुरुवारी (दि.19) सकाळी नऊ ते बारा दरम्यान ‘क’ आणि ‘इ’ क्षेत्रीय कार्यालयातंर्गत भोसरी, मोशी, मासुळकर कॉलनी, नाशिक रोड भोसरी, दिघी रोड, लांडेवाडी बोपखेल, च-होली, मोशी या ठिकाणी प्लास्टिक व थर्माकोल कचर्‍याचे संकलन केले जाणार आहे. शुक्रवार (दि. 20) ‘अ, ‘ब’, ‘क’ व ‘फ’ क्षेत्रीय कार्यालयांतर्गत भेळ चौक निगडी प्राधिकरण, एमआयडीसी चिंचवड, मोरवाडी कॉलनी, आनंदनगर चिंचवड, काळभोरनगर, लिंकरोड चिंचवडगाव, वाल्हेकरवाडी, चाफेकर चौक, रावेत, लोकमान्य टिळक चौक निगडी, कृष्णानगर चिखली, रुपीनगर, तळवडे येथे प्लास्टिक व थर्माकोल संकलन केले जाणार आहे. शनिवारी (दि. 21) ’ड’, ’ग’ व ’ह’ क्षेत्रीय कार्यालयांतर्गत औंध-रावेत रोड रहाटणी, रहाटणी रोड पिंपळे सौदागर, मनपा दवाखान्याजवळ पिंपळे गुरव, वाकड गावठाण, थेरगाव, डांगे चौक, काळेवाडी, कासारवाडी, संत तुकारामनगर, फुगेवाडी, दापोडी, सांगवी, नवी सांगवी येथे प्लास्टिक व थर्माकोल संकलन केले जाणार आहे.
प्लास्टिकमुळे जलसाठे प्रदुषित
पर्यावरण संवर्धन समितीचे अध्यक्ष विकास पाटील म्हणाले की, प्लास्टिक वापरावर आलेली बंदी आपण आजपर्यंत केलेल्या प्लास्टिक वापराच्या अतिरेकाची परिणीती आहे. विशेषतः आपले जलसाठे व जमीन यांचे पर्यावरण प्रदूषित होत चालले आहे. हवेतील प्रदूषणही प्रचंड प्रमाणात वाढले आहे. आपल्या सवयी बदलून व शासनाने लागू केलेल्या प्लास्टिक बंदी कायद्याला अनुसरून आचरण करावे. आपल्याकडील प्लास्टिक व थर्माकोल संकलन केंद्रांवर जमा करावे. प्लास्टिक व थर्माकोलमुक्त शहरासाठी प्रत्येकाने योगदान द्यावे.