फैजपूरात तलवार हल्ल्यात एक जण जखमी ; आरोपी पसार

फैजपूर- शहरात रविवारी सायंकाळी एकावर तलवार हल्ला झाला मात्र सुदैवाने तलवार फक्त बोटाला लागल्याने मोठा अनर्थ टळला. ही घटना सावदा रोडवरील आफताब ऑटो पार्टस् या दुकानाजवळ घडली. शेख इजाज अहमद शेख जाकीर उर्फ गुड्डू (वय 24) याच्यावर हल्ला करण्यात आला तर हल्लेखोर शाहरुख कलीम शेख व मुज्जमिल कयुम्म मलिक अशी आरोपींची नावे असून ते पसार झाले. या घटनेने शहरात खळबळ उडाली. गेल्याच आठवड्यात पोलिसांनी दक्षिण बाहेर पेठ येथून एका घरातून तलवारी जप्त केल्या होत्या. शहरात तलवारींचा शस्त्रसाठा असण्याची शक्यता असून पोलिसांनी धडक कारवाई करण्याची अपेक्षा आहे.

हल्ल्यानंतर दोघे आरोपी पसार
रविवारी सायंकाळी पाच वाजेच्या दरम्यान सावदा रोडवरील आफताब स्पेअर पार्ट दुकानाजवळ आरोपी शाहरुख व मुज्जमिल यांनी येऊन इजाज शेख उर्फ गुड्डू याला खुन्नसने पाहतो म्हणून किरकोळ कारणावरून मारहाण केली तर शाहरुख कलीम शेख याने तलवार काढून तुझ्या परीवारास मारून टाकेल, माझ्या जवळ 20-25 तलवारी अजून आहे, अशी धमकी दिली. या प्रकरणी गुड्डू याने तक्रार दिल्यरावरून शाहरुख व मुज्जमिल या दोघांविरुद्ध गुन्हा दाखल करण्यात आला. हल्ल्यानंतर आरोपी पसार झाला. तपास सहाय्यक पोलीस निरीक्षक दत्तात्रय निकम यांच्या मार्गदर्शनाखाली सुरू आहे.