फैजपूरात पाणीप्रश्‍न पेटला : संतप्त महिलांची पालिकेवर धडक

दुर्गंधीयुक्त पाण्यामुळे डायरीयासदृश आजाराची लागण होण्याची भीती

फैजपूर : शहरातील प्रभाग क्रमांक आठ मधील विद्यानगर भागात दुर्गंधी युक्त पाणी येत असल्याने डायरीयासदृश साथीच्या आजाराची लक्षणे काही नागरीकांना जाणवल्यानंतर संतप्त रणरागिणींनी गुरूवारी पालिकेवर धडक दिली. यावेळी या नागरीकांनी दुर्गंधी युक्त पाण्याची बादली मुख्याधिकारी यांच्यासमोर ठेवून आपला संताप व्यक्त केला. फैजपूर शहरात कोराना संसर्गजन्य रोगाच्या पार्श्वभूमीवर उपाययोजना म्हणून पालिकेकडून शहरात साफसफाई व फवारणीवर भर दिला असतांना गुरुवारी दुपारी बारा वाजेचे वेळी विद्यानगर भागातील महिला व नागरीकांनी पालिकेवर धडक देत त्यांच्या भागात काही दिवसांपासून दुर्गंधी युक्त व काळा पाणी येत असल्याची ओरड करत पाणीपुरवठा विभागात बसलेल्या मुख्याधिकारी किशोर चव्हाण यांच्या टेबलावर दुर्गंधी युक्त पाण्याची बादली ठेवून संताप व्यक्त केला.

तर आमरण उपोषणाचा इशारा
यावेळी उपस्थित नागरीकांनी मुख्याधिकारी यांना निवेदन देत आमरण उपोषण करण्यात येणार असल्याचा इशारा दिला व निवेदनाद्वारे विद्यानगर भागात नवीन पाईपलाईन टाकण्याची मागणी केली. दरम्यान, यावेळी मुख्याधिकारी किशोर चव्हाण यांनी आलेल्या नागरीकांची समस्या तत्काळ सोडविण्यात येईल, असे आश्वासन दिले. यावेळी नगरसेवक अमोल निंबाळे, नगरसेवक देवा साळी यांच्यासह प्रभाग आठमधील महिला व नागरीक उपस्थित होते.