बँक बदलली तरी अकाऊंट नंबर तोच राहणार

मुंबई । नव्या बँकेचा नवा खाते क्रमांक मिळवा, मग तो लक्षात ठेवा अशा नानाविध कटकटींना खातेधारकांना आता सामोरे जावे लागणार नाही. तुमच्या मोबाईल क्रमांकाप्रमाणे आता लवकरच तुम्हाला बँकेचे खातेही पोर्टेबल करता येणार आहे. बँक बदलली तरी नव्या बँकेत खाते क्रमांक कायम ठेवण्याची सुविधा लवकरच खातेधारकांना उपलब्ध करून दिली जाणार आहे. बँकिंग क्षेत्रातील हे खूप मोठे पाऊल मानले जात आहे. तांत्रिकी अत्याधुनिकीकरणातून आधार कार्डशी बँकेचे खाते जोडण्यात आले की ही सुविधा सहजपणे उपलब्ध करून देता येईल, असा विश्‍वास आरबीआयचे डेप्युटी गव्हर्नर एस.एस.मुंद्रा यांनी व्यक्त केला आहे. बँकिंग कोड्स अँड स्टॅण्डर्ड बोर्ड ऑफ इंडियाने आयोजित केलेल्या एका कार्यक्रमात ते बोलत होते.

खातेधारकाच्या जुन्या बँकेचाच खाते क्रमांक कायम ठेवून नव्या बँकेत नव्याने खाते सुरू करता येईल. याशिवाय, अनेक बँकांमध्ये एकच बँक खाते क्रमांक कायम ठेवण्याची सुविधा असणार आहे. यामुळे खातेधारकांना चांगली सुविधा देण्यासाठीची स्पर्धा बँकांमध्ये निर्माण होईल आणि प्रत्येक बँक आपल्या खातेधारकांना खूश ठेवण्यासाठी प्रयत्नशील राहील.

आरबीआयचे हे पाऊल खातेधारकांसाठी सोयीचे असले तरी ते प्रत्यक्षात लागू करणे बँकांसाठी खूप जिकरीचे ठरणार आहे. एकच बँक खाते क्रमांक कायम ठेवणे बँकांसाठी खूप मोठे आव्हान ठरणार आहे. यात काही उणीवा राहण्याचीही शक्यता आहे. तांत्रिक आणि डाटा-इंटिग्रेशन अतिशय चोख ठेवावे लागेल. बँकांना यासाठी त्यांची बँक खाते क्रमांकाची संपूर्ण प्रणालीची पुनर्रचना करावी लागणार आहे. प्रत्येक बँकेची खातेधारकांना खाते क्रमांक देण्याची पद्धत वेगळी आहे. त्यामुळे ती एकाच प्रणालीवर आणावी लागेल आणि यात प्रत्येक बँकेला आपले सॉफ्टवेअरर्स पूर्णपणे बदलावे लागतील, असे बँक बाझारचे सीईओ आधिल शेट्टी यांनी सांगितले.