बलात्कार्‍यास होणार फाशी!
अल्पवयीन मुलींवरील अत्याचार रोखण्यासाठी विधेयक
नवी दिल्ली : महिलांवरील अत्याचार सातत्याने वाढत असून बलात्कार, विनयभंगांचे गुन्हे रोखण्यासाठी सरकार, पोलिसांकडून प्रयत्न केले जात आहेत. मात्र, हरयाणा सरकारने बलात्काराच्या घटना रोखण्यासाठी कठोर पाऊल उचलले आहे. मध्यप्रदेशपाठोपाठ आता हरयाणातही बारा वर्षापर्यंतच्या मुलींवर बलात्कार करणार्‍यास फाशीची शिक्षा ठोठावण्यात येणार आहे. या शिक्षेची तरतूद असणारे विधेयक लवकरच विधानसभेत आणणार असल्याची माहिती मुख्यमंत्री मनोहरलाल खट्टर यांनी दिली आहे. याशिवाय बलात्काराच्या घटना रोखण्यासाठी आणि पीडितांना लवकरात लवकर न्याय देण्यासाठी फास्ट ट्रॅक कोर्टची स्थापना करण्याचा विचार सुरू असल्याचेही त्यांनी सांगितले.
बलात्कारातील आरोपींचा शोध सुरू
मुख्यमंत्री मनोहरलाल खट्टर यांनी सांगितले की, बलात्काराच्या 75 टक्के घटनांमध्ये जवळचे नातेवाईकच असतात. राज्यातील बलात्काराच्या घटनांचा तपास करण्यासाठी पोलिस दिवस रात्र मेहनत घेत असून लवकरच आरोपींना अटक करण्यात येईल. या आधी मध्यप्रदेश सरकारने बलात्काराच्या घटना रोखण्यासाठी बारा वर्षाखालील मुलींवर बलात्कार करणार्‍यास फाशीची शिक्षा ठोठावण्याचे विधेयक मंजूर केले आहे.
मध्यप्रदेशात विधेयक एकमताने मंजूर
मध्यप्रदेश सरकारने मागच्याच एक मजबूत पाऊल टाकले आहे. येथील विधानसभेने दंड विधी सुधारीत विधेयकास एकमताने मंजुरी दिली असून यावर राष्ट्रपतींच्या मान्यतेची मोहोर उमटताच याला कायद्याचे स्वरुप प्राप्त होणार आहे. या विधेयकात 12 वर्षांच्या आतील मुलीवर बलात्कार केल्यास फाशीच्या शिक्षेची तरतूद करण्यात आली आहे. नॅशनल रेकॉर्ड ब्युरोच्या आकडेवारीनुसार, मध्यप्रदेशात देशातील सर्वात जास्त बलात्काराच्या घटना घडल्या आहेत. विशेष म्हणजे शिवराजसिंग चौहान यांनी मुख्यमंत्री म्हणून आपल्या कारकिर्दीची 12 वर्षे पूर्ण केल्यानंतर ही आकडेवारी जाहीर झाली आहे.
बलात्कारी माणूस नसून पिशाच्च
जे लोक 12 वर्षांपर्यंतच्या निरागस मुलींवर बलात्कार करतात ते माणूस नसून पिशाच्च आहेत. त्यांना जगण्याचा कोणताही अधिकार नाही. इतकेच नव्हे तर महिलेचा सातत्याने पाठलाग करणे हाही आता अजामीनपात्र गुन्हा ठरणार आहे. महिलांसंदर्भातील गुन्हेगारी रोखण्यासाठी जनजागृतीचाही आधार घेतला जाणार असल्याचे विधेयकास मंजुरी मिळाल्यानंतर मुख्यमंत्री चौहान यांनी विधानसभेत म्हटले होते.