बायकोचा घटस्फोट अन पतीचा संताप अनावर : घरासह दुचाकीच जाळली

Anger at wife’s divorce: son-in-law sets fire to father-in-law’s house with two-wheeler in Jalgaon जळगाव : दाम्पत्याच्या रोजच्या वादानंतर पत्नीने पतीस घटस्फोट दिला मात्र या रागातून संतप्त पतीने सासर्‍याची दुचाकी पेटवून दिली तर आगीची झळ घरालाही बसली. या प्रकणी शनिपेठ पोलिसांत गुन्ह्याची नोंद करण्यात आली आहे.

शनीपेठ पोलिसात गुन्हा
अमीर जावेद खाटीक (40) यांनी पोलिसांत दिलेल्या तक्रारीनुसार, खाटीक हे शनिपेठेत माजी महापौर भारती सोनवणे यांच्या घराशेजारील गल्लीत आपल्या कुटुंबियांसह वास्तव्यास आहेत. ते मटण-चिकन विक्रीचा व्यवसाय करुन कुटुंबीयांचा उदरनिर्वाह चालवतात. बुधवार, 31 ऑगस्ट रोजी ते आपल्या कुटुंबीयांसह बाहेरगावी मध्यप्रदेशात गेले होते. घरबंद असल्याची संधी साधत मध्यरात्री अडीच ते तीन वाजेच्या सुमारास अज्ञात व्यक्तींने त्यांच्या घराबाहेर उभी मोटारसायकल पेटवून दिल्याची घटना घडली. मोटारसायकल पेटवल्याने आगीचा भडका उडून घराचा काही भागही जळाला आहे.

सीसीटीव्हीतून घटना स्पष्ट
सकाळी खाटीक कुटुंबीय परतल्यावर त्यांना घर आणि दुचाकी जळाल्याचे आढळून आले. त्यांनी शनिपेठ पोलिसात धाव घेतली. त्याचप्रमाणे परिसरातील सीसीटीव्हीची पाहणी केल्यावर एक दुचाकीस्वार दूरवर वाहन लावून पायी चालत आला. नंतर त्याने खिशातून पेट्रोलची बॉटल काढून वाहनावर ओतून पेटवून दिल्याचे आढळून आले आहे. वाहन पेटवणारा खाटीक कुटुंबीयांचा जवाई आदिल ऊर्फ शाहरुख सलिम खाटीक असल्याचे फुटेजवरुन स्पष्ट झाले आहे.

तीन महिन्यांपूर्वी झाला होता घटस्फोट
आदिल ऊर्फ शाहरुख सलीम खाटिक याच्याविरुद्ध अमीर खाटीक यांच्या मुलीने कौटुंबीक हिंसाचार प्रकरणी तक्रार दिल्यावरुन गुन्हा दाखल करण्यात आला. तीन महिन्यापूर्वीच या प्रकरणी घटस्फोट झाला असून भिती निर्माण करण्यासाठी आदिलने जाळपोळ केल्याचे तक्रारीत नमूद आहे.