बायोमेट्रिक हजेरीसाठी पालिका मुख्यालयात रांगा
मुंबई । मुंबई महानगरपालिकेत बायोमेट्रिक हजेरीमुळे वादंग निर्माण झाला आहे. हजारो कर्मचार्‍यांचा पगार कापला गेला असताना आता पालिकेची सॅप प्रणाली बंद पडल्याने बुधवारी पालिका कर्मचार्‍यांना आपली हजेरी लावता आलेली नाही. यामुळे पालिकेच्या अब्रूचे धिंडवडे निघाले आहेत.मुंबई महानगरपालिकेत सॅप प्रणालीद्वारे सर्व कामे केली जातात. पालिकेच्या निविदा काढण्यापासून कर्मचार्‍यांची हजेरीसुद्धा सॅपद्वारे बायोमॅट्रिक मशीनच्या माध्यमातून लावली जाते. बायोमेट्रिक मशीनमध्ये अनेक त्रुटी असल्याने कर्मचार्‍यांची हजेरी योग्य प्रकारे लागली नसल्याने प्रशासनाने तब्बल 40 हजार कर्मचार्‍यांचा पगार कापला होता. बायोमेट्रिक हजेरीच्या पद्धतीत चुका असल्याने आपला पगार कापला गेला असल्याचा आरोप केला आहे. त्यातच बुधवारी वरळी हब येथील सॅप प्रणालीसाठी लागणारी ऑप्टिकल फायबर वायर तुटल्याने पालिकेच्या अनेक कार्यालयांमध्ये कर्मचार्‍यांना हजेरी लावता आलेली नाही.
पालिकेच्या सॅप प्रणालीवर चालणार्‍या बायोमेट्रिक मशीन बंद असताना वायफाय, मोबाइल सिमकार्डवर चालणार्‍या मशीन सुरू असल्याने कर्मचार्‍यांना काही प्रमाणात दिलासा मिळाला आहे. सॅपचा फटका पालिका मुख्यालयातील कर्मचार्‍यांनाही बसला आहे. पालिका मुख्यालयातील सर्वच हजेरीच्या मशीन बंद होत्या. मात्र, पालिका आयुक्त व अतिरिक्त आयुक्त कार्यालयातील मशीन सुरू असल्याने कर्मचारी अधिकार्‍यांनी लांबच लांब रांगा लावून हजेरी लावली. सायंकाळपर्यंत सॅप प्रणाली सुरू नसल्याने कर्मचारी अधिकार्‍यांनी पुन्हा रांगा लावून थंब करून आपले घर गाठले.
मुंबई महापालिकेच्या सर्व कार्यालयांमध्ये आणि रुग्णालयांमध्ये अधिकारी व कर्मचार्‍यांच्या हजेरीसाठी बायोमेट्रिक मशीन बसवण्यात आली. मात्र, या बायोमेट्रिक मशीनचा कर्मचार्‍यांना फटका बसला असून, 40 हजार कर्मचार्‍यांचे पगार कापण्यात आले आहेत. याविरोधात आज पालिकेच्या केईएम रुग्णालयात आंदोलन करण्यात आले. यावेळी बायोमेट्रिक हजेरी बंद करावी अशी मागणी करण्यात आली. मात्र, या आंदोलनकर्त्यांना डीन अविनाश सुपे भेटले नसल्याने आंदोलन मागे घेण्यात आले.
मशीनची संख्या कमी
बायोमेट्रिक हजेरीत योग्य प्रकारे नोंद न झाल्याने नर्स आणि कर्मचार्‍यांचा पगार कापण्यात आला आहे. दर महिन्याच्या 1 तारखेला नर्स , कर्मचारी विभाग यांचा पगार होतो. पण, 7 तारीख येऊनही कर्मचार्‍यांचे पगार झाले नाहीत. तसेच ज्यांचा पगार झाला, त्यांचा ही कापण्यात आला आहे. या सर्वासाठी बायोमेट्रिक हजेरी पद्धत जबाबदार असल्याचा आरोप करत ही पद्धत बंद करा अशी मागणी काही नर्स स्टाफनी केली आहे. जोपर्यंत ही बायोमेट्रिक हजेरी पद्धत बंद होत नाही, तोपर्यंत असंच एकत्र जमून निषेध करण्यात येणार असल्याचे कर्मचार्‍यांकडून सांगण्यात येत आहे. केईएम रुग्णालयात जवळपास 15 हजार कर्मचारी वर्ग आहे. पण, त्यांच्यासाठी या मशीन्स कमी पडतात. त्यामुळे जरी वेळेवर पोहोचलो तरी आधीच हजेरीसाठी मोठ्या प्रमाणात गर्दी होते. अर्धा तास हजेरीसाठीच जातो. त्यामुळे अर्ध्या तासाचा ही पगार कापला जातो असा आरोप रुग्णालयातील नर्सनी केला आहे. बायोमॅट्रिक हजेरीमुळे कर्मचारी त्रस्त असून प्रशासनाचे लक्ष वेधण्यासाठी आज आंदोलन केल्याचे सांगण्यात आले आहे.