बारामती विभागातही आता हेल्मेट सक्ती

गुरुवारपासून होणार कारवाई; परवाना जप्त

बारामती : पुण्यापाठोपाठ आता बारातमी विभाग म्हणजेच दौंड, बारामती, इंदापूर या तिन्ही शहरांत उपप्रादेशिक परिवहन कार्यालयाच्या वतीने हेल्मेटचा वापर न करणार्‍या, सीटबेल्ट न लावता चारचाकी वाहन चालविणार्‍या वाहनचालकांविरुद्ध गुरुवारपासून (दि.24) कारवाई केली जाणार आहे. या कारवाईमध्ये दोषी वाहनचालकांचा वाहन चालविण्याचा परवाना जप्त करण्यात येणार आहे. दोषी वाहनचालकांना बारामतीच्या उपप्रादेशिक परिवहन कार्यालयात दोन तासांच्या समुपदेशनासाठी हजर राहावे लागणार आहे. अन्यथा वाहनचालकांविरोधात चालविण्यात येणारा खटला निकालात न काढण्याचा इशारा उपप्रादेशिक परीवहन कार्यालयाच्या वतीने देण्यात आला आहे.

रस्ता सुरक्षेच्या दृष्टीने सर्वोच्च न्यायालयाने वेळोवेळी निर्देश दिले आहेत. या पार्श्‍वभुमीवर वाहन अधिनियम 1988 चे कलम 19 व केंद्रीय मोटर वाहन नियम 1989 च्या नियम 21 अनुसार विविध वाहतुक गुन्ह्यासाठी वाहन चालकांचा परवाना किमान 3 महिने निलंबित करावा. हेल्मेटबाबतचे नियम वाहन चालविणार्‍या व्यक्तीसह मागे बसलेल्या व्यक्तीसाठी लागू राहणार आहे. हेल्मेटबाबत नियमांचा भंग केलेल्या व्यक्तीकडून तडजोड शुल्क वसूल करण्यापूर्वी त्यांना 2 तास कालावधीच्या रस्तासुरक्षा विषयक नियमांच्या समुपदेशनासाठी हजर राहावे लागेल, असे उपप्रादेशिक परिवहन अधिकारी दत्तात्रय सांगोलकर यांनी सांगितले.

मंगळवारी व शुक्रवारी समुपदेशन

दर मंगळवार व शुक्रवारी असे समुपदेशन होणार आहे. या समुपदेशनाला हजर राहिल्याशिवाय दोषी वाहनचालकांचा खटला निकाली काढला जाणार नसल्याची माहिती सांगोलकर यांनी दिली. नियम डावलणार्‍यांविरोधात खटला भरून किंवा परवाना रद्द करून चालणार नाही, तर दोषी वाहनचालकांचे दोन तासांचे समुपदेशन त्याची सवय बदलण्यास कारणीभूत ठरू शकेल.