बालकांचे लैंगिक शोषण केल्यास फाशी?

नवी दिल्ली : 12 वर्षापर्यंतच्या मुलींचे लैंगिक शोषण करणार्‍यांना फाशी देण्याच्या अध्यादेशाला राष्ट्रपती रामनाथ कोविंद यांनी मंजुरी दिल्यानंतर आता बालकांचे लैंगिक शोषण करणार्‍यास फाशीची शिक्षा देण्याच्या हालचाली केंद्र सरकारने सुरू केल्या आहेत. त्यासाठी पोक्सो कायद्यात सुधारणा करण्यात येणार असल्याचे सूत्रांनी सांगितले. केंद्रीय महिला आणि बाल विकास मंत्रालयाने त्यांच्या ट्विटर हँडलवरून ही माहिती दिली आहे.

लैंगिक शोषणाबाबत नेहमीच निष्पक्ष कायदा बनविण्याचे काम सरकार करत असते. त्यामुळेच लैंगिक शोषणाचा बळी ठरलेल्या मुलांना न्याय देण्यासाठी केंद्राने पोक्सो कायद्यात दुरुस्ती करण्याचा करण्याचा प्रस्ताव तयार केला आहे, असे महिला व बालकल्याण मंत्रालयाने म्हटले आहे. चेंज डॉट ओआरजी बाबत चित्रपट निर्माते इंसिया दरीवाला यांनी एक याचिका न्यायालयात दाखल केली होती. बालकांच्या लैंगिक शोषणाकडे भारतात दुर्लक्ष होत असल्याचे त्यांनी म्हटले होते. त्यांच्या या याचिकेचे महिला व बाल विकास मंत्री मनेका गांधी यांनी समर्थन केले होते.