बालिकेवर अत्याचार करणार्‍यास फाशी द्या
नंदुरबार। नाशिक रोड येथील गवळी समाजातील चार वर्षीय बालिकेवर अत्याचार करणार्या नराधमास फाशीची शिक्षा व्हावी, अशी मागणी महाराष्ट्र नवनिर्माण सेना, नंदुरबार जिल्हातर्फेकरण्यात आली आहे. याबाबत जिल्हाधिकार्यांना निवेदन देण्यात आले.
बालिकेवर अत्याचार करणार्या नराधम व्यापारी सुभाष झंवर याच्यावर कठोर शिक्षा व्हावी, त्यामुळे अशा आरोपींवर न्यायव्यवस्थेचा अंकुश असावा. नाशिक रोड येथील 51 वर्षीय व्यापार्‍याने आईस्क्रीमचे आमिष दाखवून कोवळ्या चिमुरडीवर अत्याचार करण्याचे पाप केले. माणुसकीला काळीमा फासणार्‍या या घटनेने पुन्हा एकदा महाराष्ट्र हादरला आहे. या गंभीर घटनेचा तीव्र निषेध करीत महाराष्ट्र नवनिर्माण सेना जलदगती न्यायालयात खटल्याची सुनावणी होवून नराधमास फाशीची शिक्षा व्हावी आणि पिडीत मुलीस न्याय मिळावा. अन्यथा सावित्रीच्या लेकीचे शोषण करणारे दररोज निर्माण होत राहतील, असे निवेदनात म्हटले आहे.
यांची होती उपस्थिती
या निवेदनावर मनसे जिल्हाध्यक्ष विजय चौधरी, शहराध्यक्ष ईश्‍वर ठाकूर, जिल्हा सचिव पवन गवळे, जिल्हा उपाध्यक्ष छोटू चौधरी, शहर उपाध्यक्ष सुमानसिंग राजपूत, मोसिम मोमीन, राकेश माळी, सुनिल कोकणी, दिनेश मराठे, दीपक चौधरी, गोलू चौधरी, आकाश चौधरी, प्रविण जोशी, धिरज कदम, महेश सुर्यवंशी यांच्या सह्या आहेत.