बीसीसीआयच्या करारातून वगळले मोहम्मद शमीला!

मुंबई । भारतीय क्रिकेटपटू मालामाल होत चाललेत, याचे ताजे उदाहरण म्हणजे भारतीय क्रिकेट नियामक मंडळाने या वर्षासाठी खेळाडूंसाठी केलेले करार. बीसीसीआयने ऑक्टोबर 2017 ते सप्टेंबर 2018 या वर्षासाठी खेळाडूंना करारबद्ध केले असून या वर्षी ए प्लस ही नवी श्रेणी सादर केली आहे. भारताचा वेगवान गोलंदाज मोहम्मद शमी या कराराच्या यादीतून वगळण्यात आल्याने सर्वांनाच धक्का बसला आहे. शमीची पत्नी हसीन जहाँ हिने आपल्या नवर्‍यावर अनैतिक संबंध आणि मारपीट केल्याचे आरोप केले होते. त्यानंतर शमीची बीसीसीआयच्या करारातून गच्छंती करण्यात आल्यामुळे सर्वांच्याच भुवया उंचावल्या आहेत. नवीन वेतन श्रेणीत खेळाडू कुठल्या प्रारुपाय खेळतात याचा विचार करुन त्यांचे वर्गीकरण करण्यात आले आहे. त्यानुसार क्रिकेटच्या कसोटी, एकदिवसीय आणि टी 20 प्रारुपात राष्ट्रीय संघातून खेळणार्‍या खेळाडूंचा यावर्षीपासून जाहिर करण्यात आलेल्या नव्या श्रेणीत समावेश करण्यात आला आहे. याचा फटका माजी कर्णधार महेंद्रसिंग धोनीला बसला आहे. धोनीने कसोटी क्रिकेटमधून निवृत्ती घेतली आहे. त्यामुळे त्याचा वेगळ्या श्रेणीत समावेश करण्यात आला आहे.

ए श्रेणीतील खेळाडूंना मिळणार 5 कोटी
श्रेणीतील क्रिकेटपटूंना वर्षाला 5 कोटी रुपये मिळणार असून या श्रेणीत रवीचंद्रन अश्‍विन, रवींद्र जडेजा, मुरली विजय, चेतेश्‍वर पुजारा, अजिंक्य रहाणे, महेंद्रसिंग धोनी आणि वृद्धिमनसाहाचा आदींचा यात समावेश आहे. गेल्या वर्षी ए श्रेणीतील क्रिकेटपटूंना वर्षाला 2 कोटी, बी श्रेणीतील खेळाडूंना 1 कोटी आणि सी श्रेणीतील क्रिकेटपटूंना 50 लाख रुपये मिळत होते.

बी आणि सी श्रेणीत कोण?
बी श्रेणीत लोकेश राहुल, उमेश यादव, कुलदीप यादव, युझवेंद्र चहल, हार्दिक पंड्या, इशांत शर्मा, दिनेश कार्तिक यांचा समावेश असून त्यांना वर्षाला 2 कोटी रुपये मिळणार आहेत. सी श्रेणीतील खेळाडूंना वर्षाला 1 कोटी रुपयांचे मानधन मिळणार असून त्यात केदार जाधव, मनीष पांडे, अक्षर पटेल, करुण नायर, सुरेश रैना, पार्थिव पटेल आणि जयंत यादव यांचा समावेश आहे. मुंबईकर शार्दूल ठाकूर आणि श्रेयस अय्यर हे भारतीय संघाचा एक भाग असले तरी त्यांना मात्र या करारात स्थान देण्यात
आले नाही.

या वर्षीपासून नव्यानेच सादर करण्यात आलेल्या ए प्लस श्रेणीतील क्रिकेटपटूंना वर्षाला 7 कोटी रुपयांचे मानधन मिळणार आहे. यापूर्वी ए, बी, सी या तीनच श्रेणी होत्या. ए प्लस श्रेणीत कर्णधार विराट कोहली, रोहित शर्मा, शिखर धवन, भुवनेश्‍वर कुमार आणि जसप्रीत बुमराह या पाच क्रिकेटपटूंचा समावेश आहे. भारताचा सर्वात यशस्वी कर्णधार महेंद्रसिंग धोनीला मात्र या श्रेणीत स्थान मिळाले नाही.