भाजपची 45 मुस्लिमांना उमेदवारी

मालेगाव । महापालिका ताब्यात घेण्यासाठी भाजपने कंबर कसली आहे. सत्ता काबीज करण्यासाठी भाजपने सर्वाधिक उमेदवार उभे केले आहेत. 84 जागांपैकी 77 जागांसाठी भाजपने उमेदवार जाहीर केले आहेत. यामधील तब्बल 45 उमेदवार मुस्लिम आहेत. गेल्या निवडणूकीत भाजपच्या उमेदवारांची अमानत रक्कमसुध्दा जप्त झाली होती. येथे काँग्रेस व राष्ट्रवादी काँग्रेस या पक्षाच्या उमेदवारांनी बाजी मारली होती तर, शिवसेनेच्या 11 उमेदवारांनी मालेगाव महापालिकेवर निवडुन आले होते. मोठी मुस्लिम लोकसंख्या व राजकीय सत्तेतील स्थानिक हितसंबंध या मुद्द्यांभोवती ही निवडणूक फिरणार असली तरी मुस्लिम समुदायाला आपल्याकडे वळविण्याचा हा फंडा भाजपला कितपत साथ देतो याचे उत्तर निकालातच मिळणार आहे. राज्य व देशाच्या राजकारणातील भाजपच्या भूमिकेबद्दल मालेगावातील भाजपचे मुस्लिम उमेदवार त्यांच्या मतदारांना काय उत्तरे देतात, यावरही या खेळीची मोठी मदार असल्याचे जाणकारांचे मत आहे.

एमआयएमचीही उत्सुकता
मालेगावमधील सर्वात मोठा पक्ष असलेल्या काँग्रेसने यंदाच्या निवडणुकीत 73 उमेदवार उभे केले आहेत. राष्ट्रवादी काँग्रेस आणि जनता दल (सेक्युलर) आघाडीने 66 उमेदवार दिले आहेत. असदुद्दीन ओवैसी यांच्या एमआयएमनेदेखील मालेगाव महापालिका निवडणुकीसाठी कंबर कसली आहे. एमआयएम पहिल्यांदाच मालेगाव महापालिकेची निवडणूक लढवणार आहे. शिवसेनेने 25 उमेदवार दिले आहेत. मागील महापालिका निवडणुकीत भाजपने 24 उमेदवार दिले होते. त्यावेळी भाजपचे सर्व उमेदवार पराभूत झाले होते. भाजप 12 उमेदवारांना अनामतदेखील वाचवता आली नव्हती. सध्या मालेगाव महापालिकेत काँग्रेसचे 25, राष्ट्रवादी काँग्रेसचे 22 तर शिवसेनेचे 11 नगरसेवक आहेत.

भाजपची मालेगावात अस्तित्वाची लढाई : गेल्या निवडणुकीत भाजपचा झालेला पराभव आता यावेळी भाजपने मुस्लिम मतांना आपल्याकडे वळविण्यासाठी प्रथमच मालेगाव महापालिकेवर मोठ्या प्रमाणात मुस्लिम उमेदवार दिले आहेत. या निवडणुकीवरुन मुस्लिम मतदार किती प्रमाणात भाजपाकडे वळले हे ठरणार आहे.

‘मोदी लाटे’त नैय्या पार करण्याचा प्रयत्न
मालेगाव महापालिका निवडणुकीच्या आधीच भाजपने इतिहास रचला आहे. एकाच निवडणुकीत इतक्या मोठ्या प्रमाणात मुस्लिम उमेदवारांना संधी देण्याची भाजपची ही पहिलीच वेळ आहे. याआधी देशभरात भाजपने कधीही इतक्या मोठ्या प्रमाणात मुस्लिमांना उमेदवारी दिलेली नाही. एकाच निवडणुकीत सर्वाधिक मुस्लिम उमेदवारांना संधी देण्याचा विक्रम भाजपने मालेगाव महापालिका निवडणुकीत केला आहे. ‘मोदी लाटे’त नैय्या पार करण्याचा प्रयत्न मालेगावात भाजपकडून सुरू आहे.