भाजपाकडून मी पुण्याचा उमेदवार – संजय काकडे 

राष्ट्रवादी काँग्रेसचे नेते अंकुश काकडे यांच्या माध्यमातून गेल्या काही काळापासून वाडेश्‍वर कट्टा आयोजित केला जातो. विविध क्षेत्रातील मान्यवरांना याठिकाणी आमंत्रित केले जाते. बुधवारी सर्व पक्षीय राजकीय नेत्यांना आमंत्रित करण्यात आले होते. आगामी लोकसभेच्या धामधुमीच्या निमित्ताने हा कट्टा आयोजित करण्यात आला होता. यावेळी काकडे बोलत होते. शिवसेनेच्या नेत्या नीलम गोर्‍हे, काँग्रेसकडून लोकसभेसाठी इच्छुक असलेले माजी आमदार मोहन जोशी, मनसेचे स्थानिक नेते बाबू वागस्कर तसेच राष्ट्रवादी काँग्रेसचे प्रवक्ते अंकुश काकडे उपस्थित होते.

पुण्याचा भावी खासदार कोण, याप्रश्‍नावर काकडे म्हणाले, मी आगामी लोकसभा निवडणुकीत भाजपाकडून पुण्याची जागा लढवणार आहे. माझा मेरिट पाहता पक्ष मला संधी देईल आणि मी आतापर्यंत दीड लाख सभासद केले आहे. मी आता जनतेमधून संसदेत जाणार आहे. मला 70 टक्के पुणेकरांची पसंती आहे, लोकसभेसाठी भाजपकडून मीच इलेक्टिव्ह मेरिट असलेला उमेदवार असल्याचे, सांगत इतर दोघा इच्छुकांपेक्षा मीच उमेदवारीसाठी लायक असल्याचा दावा त्यांनी केला.

दरम्यान मंगळवारच्या पुण्यातील भूमिपूजन सोहळ्यात संजय काकडे अनुपस्थित होते. मुंबईतदेखील भाजपने सहयोगी पक्षांना निमंत्रण दिले नव्हते आणि पुण्याच्या कार्यक्रमाला मला बोलवले नाही म्हणून गेलो नाही, असे काकडे यांनी सांगितले.

शिवसेनेच्या नेत्या नीलम गोर्‍हे यांनी मंगळवारी झालेल्या मोदींच्या कार्यक्रमाला शिवसेना पक्ष प्रमुख उद्धव ठाकरे यांना निमंत्रण नसल्याने नाराजी व्यक्त केली. आगामी निवडणुकीत आमचा उमेदवार पक्ष प्रमुख ठरवतील. आमच्याकडे स्वतःची उमेदवारी स्वतःच घोषित करण्याची पद्धत नाही, असा खोचक टोला त्यांनी संजय काकडे यांना मारला. तर युती करण्याबाबतचा अंतिम निर्णय उद्धव ठाकरे लवकरच जाहीर करतील असे गोर्‍हे यांनी सांगितले.

काँग्रेसकडून लोकसभेसाठी आपण इच्छुक आहे. इतर ही काही नेते पक्षात येण्यास इच्छुक आहेत. मात्र, आम्ही ज्याला पक्ष उमेदवारी देईल त्याच्या मागे सर्वशक्तीनिशी उभे राहू आणि पक्षाला विजय मिळवून देऊ, असे मोहन जोशी यावेळी म्हणाले.