भाजप, काँग्रेस-राष्ट्रवादीच्या कार्यकर्त्यांमध्ये जुंपली

सांगली: जिल्ह्यातील हरिपूर गावात राजकीय वर्चस्वासाठी भाजप आणि काँग्रेस-राष्ट्रवादीच्या कार्यकर्त्यांमध्ये झालेल्या हाणामारीप्रकरणी 65 जणांवर गुन्हे दाखल करण्यात आले अहेत. दरम्यान, तक्रार दाखल करण्यास गेले असता पोलिसांनीच मारहाण केल्याचा आरोप या प्रकरणातील एका गटाने केला आहे.

भाजपच्या बोंद्रे आणि काँग्रेस राष्ट्रवादी काँग्रेसच्या फाकडे गटात काठ्या आणि दगडाने तुंबळ हाणामारी झाली. या हाणामारीत दोन्हीही गटातल्या 3 चारचाकी फुटल्या, तर 3 जण जखमी झाले आहेत. या घटनेनंतर गावात तणावाचे वातावरण निर्माण झाल्याने पोलिसांनी मोठा बंदोबस्त लावला होता. विशेष म्हणजे, याप्रकरणी तक्रार दाखल करण्यास गेले असता पोलिसांनीच मारहाण केल्याचा आरोप यातील फाकडे गटाने केला आहे. याप्रकरणी भाजपचे जिल्हा सरचिटणीस अरविंद तांबवेकर यांच्या मुलासह दोन्ही गटाच्या एकूण 65 जणांवर गुन्हा दाखल झाला आहे.

याआधीदेखील दोन्ही गटांमध्ये राजकीय वर्चस्वासाठी हाणामारी झाल्याची माहिती पोलिसांनी दिली. तीन दिवसांपूर्वी अंकलीत बोंद्रे गटाचे समर्थक कामानिमित्त सांगलीकडे चालले होते. त्यावेळी फाकडे गटाच्या समर्थकांनी आपली दुचाकी आडवी लावली. यावरुन बोंद्रे आणि फाकडे गटामध्ये धुसफूस सुरू होती. याप्रकरणी तक्रार दाखल करण्याचे आवाहन पोलिसांनी केले होते. पण तरीही यासाठी कोणी पुढाकार घेतला नव्हता. अखेर या दोन्ही गटांत तुंबळ हाणामारी झाली. यावेळी तीन वाहनांची तोडफोड करण्यात आली, तर तीन जण जखमी झाले. विशेष म्हणजे, दोन्ही गटांतील हाणामारी सांगलीतील शास्त्री चौक परिसरातपर्यंत पोहोचली होती.