चकमकीत 4 दहशतवादी ठार, 2 जवान शहीद

श्रीनगर : जम्मू-काश्मीरच्या पुलवामा जिल्ह्यातील त्राल येथील लाम गावात सुरू असलेल्या चकमकीत चार दहशतवाद्यांना कंठस्नान घालण्यात सुरक्षादलाला यश आले. मंगळवारी सकाळपासूनच ही चकमक सुरू होती. चकमकीदरम्यान दहशतवाद्यांशी दोन हात करताना सुरक्षा दलाचे दोन जवान शहीद झाले. यात एका लष्कराच्या आणि एका पोलीस दलातील जवानाचा समावेश आहे.

दहशतवादी लपून बसले होते
मंगळवारी दक्षिण काश्मीरमधील या भागात काही दहशतवादी लपून बसले असल्याची माहिती जम्मू-काश्मीर पोलिसांना मिळाली होती. राज्याचे पोलीस महासंचालक एस. पी. वैद्य यांनी या कारवाईबाबत माहिती देताना सांगितले की, लष्कर आणि जम्मू-काश्मीर पोलीस दलातील जवानांनी त्रालमधील या परिसराला सर्व बाजूंनी घेरले. त्यानंतर जवानांनी शोध मोहीम हाती घेतली. दरम्यान, दहशतवाद्यांनी जवानांच्या दिशेने गोळीबार सुरू केला, मात्र भारतीय जवानांनी त्यांना सडेतोड उत्तर दिले. यापूर्वी, उत्तर काश्मीर भागातील कुपवाडा जिल्ह्यात रविवारी सुरक्षा दलाच्या जवानांनी दहशतवाद्यांचे एक ठिकाण उद्ध्वस्त करत हत्यारे आणि स्फोटके हस्तगत केली होती. या कारवाईने दहशतवाद्यांचा मोठा कट उधळला गेला होता.