भीमा-कोरेगाव हिंसाचार: आनंद तेलतुंबडेला अटक

पुणे- भीमा-कोरेगाव हिंसाचार आणि नक्षलवाद्यांशी संबंध असल्याच्या आरोपावरून आनंद तेलतुंबडे याला आज सकाळी पुणे पोलिसांनी अटक केली आहे. पुण्यातील सत्र न्यायालयाने काल त्याचा अटकपूर्व जामीनअर्ज फेटाळला होता. त्यानंतर आज सकाळी पुणे पोलिसांनी त्याला अटक केली. मुंबई विमानतळावर उतरताच पुणे पोलिसांकडून तेलतुंबडेला अटक केली. पोलीस आज त्याला न्यायालयात हजर करून त्याच्या कोठडीची मागणी करणार आहेत.

पुणे पोलिसांनी आनंद तेलतुंबडे यांच्यावर नक्षलवादी संघटनेशी संबंध असल्याप्रकरणी कारवाई केली होती. मात्र ‘मी कोणत्याही बेकायदा कार्यवाहीत सहभागी झालेली नाही आणि कोरेगाव-भीमा येथे झालेल्या हिंसाचाराशी माझा काहीही संबंध नाही’, असा दावा करत आनंद तेलतुंबडे यांनी मुंबई उच्च न्यायालयात याचिका दाखल करत त्यांच्यावरील एफआयआर रद्द करण्याची मागणी केली होती.

मुंबई उच्च न्यायालयात आनंद तेलतुंबडे यांच्या याचिकेवर २१ डिसेंबर रोजी सुनावणी झाली. न्यायालयाने तेलतुंबडे यांची याचिका फेटाळून लावली असून, त्यांना सर्वोच्च न्यायालयात तीन आठवड्यांत दाद मागण्याची मुदत देण्यात आली आहे. नक्षलवाद्यांशी संबंध असल्याच्या आरोपाखाली प्रा. वरवरा राव, सुधा भारद्वाज, अरुण परेरा, वर्नन गोन्साल्विस आणि गौतम नवलखा यांना पुणे पोलिसांनी अटक केली होती.