भुसावळातील गोळीबार प्रकरणातील आरोपींना न्यायालयीन कोठडी

भुसावळ- महामानव डॉ.बाबासाहेब आंबेडकर जयंती उत्सव समितीच्या अध्यक्षपदाच्या निवडीवरून वाद विकोपाला गेल्यानंतर समता नगरातील रहिवासी तथा पालिकेचे बांधकाम समिती सभापती व भाजपाचे नगरसेवक रवींद्र उर्फ हम्प्या बाबूराव खरात यांच्या घराबाहेर सोमवारी पहाटे दोन वाजता गावठी कट्ट्यातून गोळीबार केल्याप्रकरणी सहा आरोपींना शहर पोलिसांनी अटक केली होती. आरोपींची 1 मार्च रोजी पोलिस कोठडी संपल्याने त्यांना न्या.डी.एम.शिंदे यांच्या न्यायासनापुढे हजर केले असता सर्व आरोपींची न्यायालयीन कोठडीत रवानगी करण्यात आली.

सहा आरोपींना न्यायालयीन कोठडी
जयंती अध्यक्षपदाच्या निवडीवरून झालेल्या वादानंतर सोमवारी पहाटे दोन वाजता नगरसेवक खरात यांच्या समता नगराबाहेरील घराबाहेर गोळीबार होवून तुफान दगडफेकीत एक जण जखमी झाला होता. या प्रकरणी नगरसेवक रवींद्र खरात, जयंती उत्सव समितीचे अध्यक्ष राहुल उर्फ बाळा डिगंबर सोनवणे, नरेंद्र उर्फ बाळा अरुण मोरे, गिरीश देविदास तायडे, शुभम रमेश कांबळे तसेच गोळीबार करणारा अक्षय प्रताप माहुरकर (21, चक्रधर नगर, भुसावळ) यास अटक करण्यात आली होती. आरोपींना शुक्रवारी न्यायालयात हजर केले असता त्यांची न्यायालयीन कोठडीत रवानगी करण्यात आली. सरकारतर्फे अ‍ॅड.नवाब अहमद यांनी युक्तीवाद केला. तपास पोलिस उपनिरीक्षक एन.बी.सूर्यवंशी करीत आहेत.