भुसावळातील रेल्वेच्या परीसराला नद्यांची नावे

स्टेशन परीसराची ओळख विंध्याचल कॉलनी ; झेडआरटीआय परीसर झाला सरस्वती कॉलनी

भुसावळ- भुसावळात ब्रिटीशकाळात रेल्वे परीसराला देण्यात आलेली नावे लवकरच कालबाह्य होणार असून या परीसरांना आता देशातील विविध नद्यांची नावे तसेच जगप्रसिद्ध लेण्यांची नावे देण्याचा निर्णय रेल्वे प्रशासनाने घेतला आहे. शहरातील आठ बंगला, दहा बंगला, चाळीसगाव बंगला या नावाने परीचित असलेल्या भागांची नावे बदलण्याचा ऐतिहासीक निर्णय रेल्वे प्रशासनाने घेतल्याने शहरवासीयांना रेल्वे परीसरातील तोंडपाठ असलेली नावे आता इतिहासजमा होणार आहे.

रेल्वेकडून नियमांची अंमलबजावणी
शहरातील रेल्वे परीसरात ब्रिटीशकाळात बांधण्यात आलेल्या बंगल्यांच्या संख्येनुसार आठ, दहा, चाळीस बंगले या पद्धत्तीने नावे देण्यात आली होती तर गेल्या अनेक वर्षांपासून या नावाने या भागांची ओळख होत होती मात्र प्रत्यक्षात सर्वच बंगले एकाच ठिकाणी नसल्याने व ते विखुरले असल्याने त्या भागाची ओळख (आयडेंटी) निर्माण होण्यास काहीशा अडचणी येत असल्याने डीआरएम आर.के.यादव यांनी या कॉलनी भागातील नामकरणाबाबत प्रस्ताव सादर केल्यानंतर त्यास वरीष्ठ स्तरावरून मंजूरीदेखील मिळाली आहे. रेल्वे परीसरातील बदललेल्या भागांची आता नद्या तसेच लेण्यांच्या माध्यमातून नवी ओळख निर्माण होणार असून बदललेल्या नावांबाबत नामफलक लावण्याच्या कामास रेल्वे प्रशासनाने वेग दिला आहे.

या भागांच्या नावात झाला बदल
रेल्वेच्या पंधरा बंगला भागातील अकाऊंट कॉलनी, हनुमान मंदिर, पीओएच कॉलनी, नर्सरी लाईन भागाची आता अजंनी कॉलनी म्हणून ओळख होणार आहे तर इन्स्टिट्यूट एरीया ते सीवायएम कार्यालय एरीया या भागाला एलोरा कॉलनी, गार्ड लाईन, फिल्म गोडावून, इंजि.ट्रेनिंग सेंटरला सातपुडा कॉलनी, 40 बंगला, आरपीएफ बॅरेक बाजूच्या परीसराला गंगोत्री कॉलनी, लिंम्पस क्लब ते एमओएचपर्यंतच्या परीसराला यमुनोत्री कॉलनी, रेल्वे नॉर्थ कॉलनी गोदावरी कॉलनी, सी रोड ते डॉ.बाबासाहेब उद्यानापर्यंत गिरणा कॉलनी, अधिकार्‍यांच्या निवासस्थानांना ताप्ती कॉलनी, नर्स कॉलनी आता इंद्रायणी कॉलनी, 12 बंगला कोयना कॉलनी, फिल्टर रोड, नेहरू रोड, मिशन रोड कृष्णा कॉलनी तर आठ बंगला आता कावेरी कॉलनी म्हणून ओळखला जाईल. डीआरएम कार्यालयासमोरील परीसर पंचगंगा कॉलनी, कंडारी, पीओएच कॉलनी आता पूर्णा कॉलनी म्हणून ओळखली जाईल तर भुसावळ स्टेशन व बसस्थानक परीसर विंध्याचल कॉलनी, न्यू पोर्टर चाळ, मच्छि मार्केटमागील परीसर चांदमारी चाळ, आगवाली चाळ, हद्दीवाली चाळ भागाचे वाघूर कॉलनी तसेच झेडआरटीआय परीसराची सरस्वती कॉलनी म्हणून आता ओळख निर्माण होणार आहे.