भुसावळात टेम्पोच्या धडकेत सायकलस्वार जखमी

भुसावळ- भरधाव माल वाहतूक करणार्‍या टेम्पोने धडक दिल्याने सायकलस्वार जखमी झाल्याची घटना महामार्गावरील पूजा कॉम्प्लेक्ससमोर 4 रोजी रात्री साडेआठ वाजेच्या सुमारास घडली. या प्रकरणी बाजारपेठ पोलिसात टेम्पो चालकाविरुद्ध गुन्हा दाखल करण्यात आला असून वाहन जप्त करण्यात आले आहे. कैलास श्रीराम पाटील हे जळगावच्या राजू कोचर यांच्या बोअरींगवर कामाला असून 4 रोजीरात्री साडेआठ वाजेच्या सुमारास ते पूजा कॉम्प्लेक्सजवळील विवेकानंद नगरातील आपल्या घराकडे जात असताना भरधाव टेम्पो (एम.एच.16 सी.सी.2489) ने त्यांना जोरदार धडक दिल्याने ते गंभीर जखमी झाले. अपघातानंतर जमावाने पाटील यांना शहरातील डॉ.निलेश महाजन यांच्या रुग्णालयात दाखल केले तर अपघातानंतर वाहन चालक पसार झाले. नागरीकांनी वाहनाचा क्रमांक पाहिला असल्याने त्यांनी जखमी यांचा मुलगा हितेश कैलास पाटील याला याबाबतची माहिती दिल्यानंतर त्यांनी शुक्रवारी बाजारपेठ पोलिसात संबंधित चालक गणेश भगवान आव्हाड (पांगरमलगाव, अहमदनगर, एमआयडीसी) याच्याविरुद्ध गुन्हा दाखल केला असून पोलिसांनी अपघातग्रस्त वाहन जप्त केले आहे.