भुसावळ विभागात वेगवेगळ्या अपघातात तिघे ठार

सहस्त्रलिंगजवळ दाम्पत्याचा तर वरणगावजवळ कुर्‍हा-वढोदा तलाठ्याचा मृत्यू

भुसावळ : भुसावळ विभागात सोमवार अपघात ठरला. वेगवेगळ्या दोन अपघातात दाम्पत्यासह तलाठ्याचा दुर्देवी मृत्यू झाला. पहिल्या घटनेत सुटी संपल्याने कर्तव्यावर हजर होण्यासाठी जाणार्‍या मुक्ताईनगर तालुक्यातील तलाठ्याच्या वाहनाला वरणगावजवळ भरधाव ट्रकने धडक दिल्याने त्यांचा मृत्यू ओढवला तर दुसर्‍या घटनेत पालला शासकीय कामानिमित्त जाणार्‍या वनरक्षक महिलेसह तिच्या पतीला भरधाव चारचाकीने धडक दिल्याने दोघांचा मृत्यू झाला. या घटनेने शोककळा पसरली तर अपघाताला कारणीभूत असलेले वाहन चालक मात्र अपघातानंतर पसार झाले.

महेंद्रा पिकअपच्या धडकेत पती-पत्नी ठार
रावेर- भरधाव महेंद्रा पिकअपने धडक दिल्याने दुचाकीवरील वनरक्षक महिलेसह तिच्या पतीचाही मृत्यू झाला. सोमवारी दुपारी दोन वाजेच्या सुमारास सहस्रलिंगजवळ हा अपघात झाला. अपघातानंतर पीकअप चालक पसार झाला आहे. ठार झालेल्यांमध्ये प्रादेशिक वनीकरणाच्या वनरक्षक ममता पाटील व त्यांचे पती हेमंत पाटील यांचा समावेश आहे.

पालकडे जाताना अपघात
पाटील दाम्पत्य आपल्या दुचाकीवरून शासकीय कामानिमित्त पालकडे सोमवारी दुचाकीने निघाले असताना सहस्रलिंगनजीक भरधाव महेंद्र पीकअप वाहनाने दुचाकीला धडक दिली. दुचाकीच्या जोरदार धडकेत वनरक्षक ममता पाटील या जागीच गतप्राण झाल्या तर त्यांचे पती हेमंत पाटील यांना जळगाव येथे हलवत असताना त्यांचीही प्राणज्योत मालवली. अपघाताची माहिती कळताच वनक्षेत्रपाल मुकेश महाजन यांनी वनपाल अतुल तायडे , संजय भदाणे, वनरक्षक हरीष थोरात यांना तत्काळ घटनास्थळी पाठविले. मृत दाम्पत्याचे मृतदेहावर रावेर ग्रामीण रुग्णालयात शवविच्छेदन करण्यात आले. अपघातानंतर पीकअप चालक पसार झाला आहे. मृत वनरक्षक ममता पाटील या पालला नोकरीस होत्या तर त्यांच्या पश्‍चात चार वर्षीय मुलगी आहे.

भरधाव ट्रकच्या धडकेत कुर्‍हा-वढोद्याचे तलाठी ठार

वरणगाव- मुक्ताईनगर महामार्गावरील नागराणी पेट्रोल पंपाजवळ भरधाव ट्रकने समोरून येणार्‍या कारला धडक दिल्याने कुर्‍हा वढोदा गावाचे तलाठी ठार झाले. सोमवार पहाटे साडेतीन वाजेच्या सुमारास हा अपघात झाला. या अपघातात धीरज दगडू ढेकणे (45, रा.काठी, ता.तुळजापूर, जि.उस्मानाबाद) यांचा मृत्यू झाला.

दरवाजा तोडून मृतदेह काढला बाहेर
रजा संपल्याने सेवेवर हजर होण्यासाठी धीरज ढेकणे हे महेंद्रा कार (एच.एच.25 ए.एल.6660) ने वरणगावकडून मुक्ताईनगरकडे जात असतांना नागराणी पेट्रोल पंपाजवळ समोरून येणारा ट्रक (एम.एच.18 ए.एल.3731) ने जोरदार धडक दिल्याने ढेकणे यांचा जागीच मृत्यू झाला. वरणगाव पोलिसांना अपघाताची माहिती मिळताच सहाय्यक निरीक्षक संदीपकुमार बोरसे, हवालदार शेळके, नागेंद्र तायडे, भालशंकर, निकम, वाहतूक पोलिस मोरे आदींनी अपघातस्थळी धाव घेत जेसीबीद्वारे कारचे दरवाजे तोडून मृतदेह बाहेर काढला. कुर्‍हा काकोडा परीसरात लोकप्रिय तलाठी म्हणून ढेकणे यांची ख्याती असल्याने त्यांच्या मृत्यूनंतर हळहळ व्यक्त करण्यात आली. त्यांच्या पश्चात एक मुलगा, एक मुलगी, पत्नी, आई-वडील असा परीवार आहे.