मनपाच्या प्रतीक्षानगर पोटनिवडणुकीत 41 टक्के मतदान

मुंबई । मुंबई महापालिकेच्या सायन प्रभाग क्रमांक 173 चे नगरसेवक प्रल्हाद ठोंबरे यांचे निधन झाल्याने या प्रभागात पोटनिवडणूक घेण्यात आली. या निवडणुकीत 41 टक्के मतदान झाले. शिवसेनेच्या विरोधात काँग्रेसने शिवसेनेच्या कार्यकर्त्याला उमेदवारी दिल्याने या पोटनिवडणुकीत रंगत निर्माण झाली होती. मागीलवेळी या ठिकाणी 29 टक्के मतदान झाले होते. पोटनिवडणुकीत मतदानाच्या टक्केवारीत वाढ झाल्याने या जागेवर कोण बाजी मारणार याकडे प्रभागातील नागरिकांचे तसेच राजकीय पक्षांचे लक्ष लागले आहे.

सायन प्रभाग क्रमांक 173 मधून शिवसेनेचे प्रल्हाद ठोंबरे नगरसेवक म्हणून निवडून आले होते. त्यांची प्रभाग समिती अध्यक्षपदी निवड झाली होती. मात्र काही कालावधीत त्यांचे निधन झाले. त्यामुळे रिक्त झालेल्या जागेसाठी पोटनिवडणूक घेण्यात आली. या निवडणुकीसाठी शिवसेनेच्यावतीने रामदास कांबळे व संदीप कांबळे या दोन भावांचे उमेदवारी अर्ज दाखल करण्यात आले होते. शिवसेनेच्या विरोधात दिवंगत नगरसेवक ठोंबरे यांचे भाऊ बापू ठोंबरे यांनी अपक्ष म्हणून अर्ज भरला होता.

प्रभाग 21 मधील भाजपा नगरसेविका शैलजा गिरकर यांच्या निधनानंतर झालेल्या पोटनिवडणुकीत शिवसेनेने उमेदवार न देता भाजपाला पाठिंबा दिला होता. त्याची परतफेड भाजपाने प्रभाग क्रमांक173 मध्ये उमेदवार न देता शिवसेनेला पाठिंबा दिला होता. या निवडणुकीत शिवसेनेचे रामदास कांबळे, काँग्रेसचे सुनील शेट्ये व अपक्ष असलेले गौतम झेंडे आपले नशीब आजमावत आहेत. आज झालेल्या निवडणुकीत 32 हजार 851 मतदारांपैकी 13 हजार 171 मतदारांनी आपला मतदानाचा हक्क बजावला. मतदानाचा टक्का 41 पर्यंत पोहचल्याने कोणाचा विजय होणार याकडे आता प्रभागातील नागरिकांचे लक्ष लागले आहे. आज (शनिवारी) सायन येथील जोगळेकरवाडी शाळेत मतमोजणी होणार आहे.