महात्मा फुले विकास महामंडळाचा व्यवस्थापकास लाच घेतांना अटक

पुणे- महात्मा फुले विकास महामंडळाचा जिल्हा व्यवस्थापक पाचशे रुपयांची लाच घेताना लाचलुचपत प्रतिबंधक विभागाच्या जाळ्यात अडकला. ७/१२ उता-यावरील कर्जाचा बोजा कमी करण्यासाठी लाच मागितली होती. याप्रकरणी २९ वर्षीय इसमाने लाचलुचपत प्रतिबंधक विभागाकडे तक्रार दिली. त्यानुसार सुनील लक्ष्मण काची (वय ४४, वर्ग २ जिल्हा व्यवस्थापक, महात्मा फुले मागासवर्ग विकास महामंडळ, पुणे, रा. पिंपळे गुरव, पुणे) याला लाचलुचपत प्रतिबंधक विभागाने रंगेहाथ पकडले.

लाचलुचपत प्रतिबंधक विभागाच्या अधिका-यांनी दिलेल्या माहितीनुसार, २९  वर्षीय तक्रारदाराच्या आजोबांनी महात्मा फुले विकास महामंडळाकडून कर्ज घेतले होते. त्याची नोंद तक्रारदार यांच्या ७/१२ उताऱ्यावर होती. राज्य सरकारने महामंडळाकडून घेतलेली सर्व कर्जे माफ केली आहेत. म्हणून तक्रारदाराने ७/१२ उताऱ्यावरील कर्जाचा बोजा कमी करण्यासाठी महामंडळाकडे अर्ज केला. त्याबाबत महामंडळाकडून तक्रारदाराला दाखलाही देण्यात आला. मात्र देण्यात आलेल्या दाखल्यावर रक्कमेचा उल्लेख नव्हता.

त्या दाखल्यामध्ये रक्कमेचा उल्लेख करून दाखला घेण्यासाठी वर्ग दोन जिल्हा व्यवस्थापक सुनील काची याने तक्रारदाराकडे 500 रुपयाची लाच मागितली. ही लाच महामंडळाच्या कार्यालयात स्वीकारताना आरोपीला रंगेहाथ पकडले. ही कामगिरी उपअधीक्षक दत्तात्रय भापकर, पोलीस निरीक्षक एस एस घार्गे आणि त्यांच्या पथकाने केली.