महिलांसाठी टी-20 लीग सुरू करा!
हैदरबाद । पुरुष क्रिकेटपटूंप्रमाणे महिला क्रिकेटपटूंसाठीही आयपीएलच्या धर्तीवर एखादी टी 20 लीग असावी, अशी इच्छा महिला क्रिकेट संघाची कर्णधार मिताली राजने व्यक्त केली आहे. यावर्षी मितालीच्या नेतृत्वाखाली खेळताना भारताने आयसीसी महिला विश्‍वचषक क्रिकेट स्पर्धेच्या अंतिम फेरीत धडक मारली होती.
गेल्या काही वर्षात आयपीएलमुळे पुरुषांच्या क्रिकेटला जो लाभ मिळाला आहे, तो महिला क्रिकेटलाही मिळावा आणि देशात मोठ्या प्रमाणावर महिला क्रिकेटपटू तयार व्हाव्यात, यासाठी महिला टी20 लीग सुरु व्हावी, अशी इच्छा मितालीने व्यक्त केली. एका साप्ताहिकाला दिलेल्या मुलाखतीत मिताली राजने आपला मानस बोलून दाखवला. आयपीएलप्रमाणे महिलांसाठी टी 20 लीग सुरु झाली, तर मोठ्या प्रमाणावर महिला क्रिकेटपटू तयार होतील. महिला क्रिकेटचे भवितव्य उज्ज्वल आहे. दक्षिण आफ्रिका किंवा ऑस्ट्रेलियाविरुद्ध होणारे आमचे सामने प्रेक्षक काळजीपूर्वक पाहतील आणि आमच्या कामगिरीचे निरीक्षण करतील, याची मला खात्री आहे. कारण त्यांना आमच्याकडून खूप अपेक्षा आहेत असे मिताली म्हणाली.