माझ्या बदनामीसाठी क्रांतीज्योती सावित्रीबाई फुले यांच्या नावाचा वापर करणे निंदनीय – महापौर माई ढोरे
महिलांना ताठ मानेने जगण्याची प्रेरणा देणार्‍या सावित्रीबाई यांच्याविषयी मी स्वप्नातही चुकीचे बोलू शकणार नाही
पिंपरी चिंचवड :- भारतातील मुलींना शिक्षणाचे दार खुले करणार्‍या क्रांतीज्योती सावित्रीबाई फुले यांच्याविषयी प्रत्येक महिलेला अभिमान वाटतो. सावित्रीबाई फुले यांच्यामुळेच मी शिक्षण घेऊ शकले आणि त्यांनी दिलेल्या अधिकारामुळेच आज महापौरपदापर्यंत पोहोचू शकले याचे मला पूर्ण भान आहे. परंतु माझ्या राजकीय बदनामीसाठी मी सावित्रीबाई फुले यांच्याविषयी चुकीचे वक्तव्य केल्याचे पसरवले जात आहे. महिलांना ताठ मानेने जगण्याची प्रेरणा देणार्‍या सावित्रीबाई यांच्याविषयी मी स्वप्नातही चुकीचे बोलू शकणार नाही. एक महिला महापौर आहे म्हणून त्यांच्या बदनामीसाठी इतक्या खालच्या पातळीवर जाऊन कोणी राजकारण करणार असेल, तर या शहरातील नागरिक ते खपवून घेणार नाहीत. माझ्या राजकीय बदनामीसाठी सावित्रीबाई फुले यांच्या नावाचा वापर करणे निंदनीय असल्याचे महापौर माई ढोरे यांनी सांगितले.
राजकीय बदनामीचे षडयंत्र…
या संदर्भात महापौर माई ढोरे म्हणाल्या, क्रांतीज्योती सावित्रीबाई फुले यांच्या जयंतीनिमित्त सांगवी येथे झालेल्या एका कार्यक्रमाला मी उपस्थित होते. या कार्यक्रमाचा संदर्भ देऊन काही जण मी सावित्रीबाई फुले यांच्याविषयी चुकीचे वक्तव्य केल्याचे पसरवले जात आहे. हे माझ्या राजकीय बदनामीचे षड्यंत्र आहे. या देशातील कोणतीही महिला सावित्रीबाई फुले यांच्याविषयी चुकून सुद्धा चुकीचे वक्तव्य करू शकत नाही. कारण देशातील प्रत्येक महिलेला आज आपण कोणामुळे ताठ मानेने जगत आहोत, याची जाणीव आहे. आज देशातील महिला प्रत्येक क्षेत्रात उत्तुंग भरारी करत आहेत. पुरूषांच्या बरोबरीने आज महिलांना स्थान मिळाले आहे. हे सर्व क्रांतीज्योती सावित्रीबाई फुले यांनी महिलांना शिक्षणाची दारे खुली झाल्यामुळेच शक्य झाले आहे.
राजकीय खच्चीकरण करण्याचा प्रयत्न…
मी सुद्धा क्रांतीज्योती सावित्रीबाई फुले यांच्यामुळेच शिक्षण घेऊ शकले. नंतर राजकारणात त्यांच्यामुळेच प्रवेश करू शकले. त्यांच्याकडून मिळालेल्या प्रेरणेमुळेच मी गेल्या 24 वर्षांपासून राजकारणात सक्रिय आहे. मी चार वेळा नगरसेविका म्हणून निवडून आली आहे. उपमहापौर, स्थायी समिती यांसारख्या महत्त्वाच्या पदांवर काम केले. आता महापौर म्हणून मला काम करण्याची संधी मिळाली आहे. माझी उत्तरोत्तर होत असलेल्या राजकीय प्रगतीचा काही जणांनी धसका घेतला आहे. त्यामुळेच माझी बदनामी व्हावी म्हणून थोर महिलेविषयी मी चुकीचे वक्तव्य केल्याचे पसरवले जात आहे. परंतु, अशा बदनामीमुळे माझे खच्चीकरण होईल, असे कोणाला वाटत असेल, तर त्यात त्यांना यश येणार नाही.