माथेरान रोप-वेच्या मातीच्या परीक्षणासाठी उत्खनन सुरू

माथेरान । माथेरानमध्ये विकासाचा स्तोत्र म्हणून तसेच पर्यायी वाहतूक व्यवस्थेसाठी रोप-वेचे काम टाटा समूहाने हाती घेतले आहे. त्यासाठी मातीचे परीक्षण करण्यासाठी रोप-वेचा मुख्य थांबा असलेल्या माधवजी पॉइंट येथे उत्खननाचे सुरू करण्यात आले आहे. माथेरानच्या पायाभूत सुविधेसाठी आणि पर्यायी मार्ग उपलब्ध होणे. कामी शासन दरबारी पाठपुरावा करूनही ठोस उपाययोजना झाली नव्हती. त्यामुळे इथे रोप-वे सुरू होण्यासाठी केंद्र शासनापर्यंत पाठपुरावा केला होता. अखेर केंद्र शासनाकडून परवानगी प्राप्त झाल्यावर माथेरानमधील मुख्य थांबा असलेल्या नौरोजी उद्यानातील माधवजी पॉइंटच्या दर्शनी भागात मातीच्या परीक्षणासाठी उत्खनन सुरू केले आहे.

पर्यटनाला चालना देणारा प्रकल्प ठरणार
हा महत्त्वाकांक्षी प्रकल्प या पर्यटनस्थळाला नव्या उगमाकडे नेणारा असून, पर्यटनाला चालना देणारा प्रकल्प ठरणारा आहे. दरम्यान, या रोप-वेने एकावेळेस ऐंशी पर्यटक ये-जा करू शकतात. आशिया खंडातील हा सर्वात मोठा रोप-वे बनणार असून, याची लांबी 1700 मीटर आणि उंची अडीच हजार फूट आहे. कर्जत -भूतीवली-गार्बट पठारमार्गे माधवजी पॉइंटपर्यंतच्या या दहा ते पंधरा मिनिटांच्या प्रवासात पर्यटकांना विविध पॉइट्स आणि निसर्गसौंदर्याने नटलेले माथेरान न्याहाळत गाठता येणार आहे. टाटा समूह रोप-वे बनवताना माथेरान नगरपालिकेची आणि वन विभागाची जागा व्यापणार आहेत. यामध्ये अनेक झाडांची कत्तल होणार आहे. त्याचप्रमाणे हेरिटेज असलेले माधवजी उद्यानातील बहुतांश जागा रोप-वेमधून उतरल्यावर पर्यटकांना वापरावी लागणार असून, यातून उद्यानात फिरावयास आलेल्या अन्य पर्यटकांनासुद्धा त्रास सहन करावा लागणार आहे.

माथेरानच्या विकासात्मकदृष्ट्या रोप-वे हा स्वागतार्ह प्रकल्प आहे. परंतु, या प्रकल्पात प्रामुख्याने स्थानिक सुशिक्षित बेरोजगारांना कामासाठी प्राधान्य मिळाले पाहिजे. रोप-वेमुळे पर्यटकांची संख्येत वाढ होणार असून, रोजगारात भर पडणार आहे. व्यवसाय वृद्धिंगत होऊन पर्यटनक्रांती पाहावयास मिळेल.
–प्रेरणा प्रसाद सावंत
नगराध्यक्षा माथेरान नगरपालिका

आम्ही माधवजी पॉइंट येथे स्टॉल्स् लावून पाच ते सहा जण व्यवसाय करत आहोत. आमच्या स्टॉल्स्च्या जागेवर हा प्रकल्प उभा राहणार असून, आम्ही पुरते बेरोजगार होणार. नगरपालिकेने तसेच रोप-वेच्या समूहाने आमच्यासाठी पर्यायी रोजगाराची व्यवस्था करावी.
– मयूर कदम,
स्टॉलधारक, माथेरान